आळंदीत ऐन कार्तिकी वारीत गांजाविक्री; छाप्यात पोलिसांना सापडला तब्बल २५ किलो गांजा!

आळंदी देवाची : कार्तिकी वारीमुळे आळंदीत संचारबंदी लागू आहे. यासोबत भर रस्त्यावर घुंडरे गल्लीच्या कोपऱ्यावर बॅरिगेटिंग करून पोलिसांचा खडा पहारा ठेवला. मात्र येथूनच अवघ्या पाचशे मीटर अंतरावरच एक महाभाग महिला ऐन वारीत गांजा विक्री करत असल्याचे पोलिसांना कळाले. आणि त्यानंतर पिंपरी पोलिस आयुक्तालयाच्या सामाजिक सुरक्षा पथकाने तिला अटक केली. छाप्यामधे एक लाख बारा हजार रूपयांची रोकड, साडे पंचवीस किलो गांजा आणि तेरा हजार रुपयांची विदेशी दारू आणि बियरच्या बाटल्या पोलिसांनी जप्त केल्या. 

शहराच्या मध्यवर्ती भागात गेल्या काही वर्षांपासून खुलेआम गांजा विक्रीचा धंदा सुरू होता. याप्रकरणी अंबिका मारूती गरूड (वय-५५, रा.घुंडरे गल्ली) हिच्यावर आळंदी पोलिस ठाण्यात गुन्हा दाखल केला आहे.

- हे ही वाचा : वालचंदनगर कंपनीने केली गगनयानच्या बुस्टरची निर्मिती; चाचणी करणारी देशातील एकमेव कंपनी

आळंदीत सध्या कार्तिकी वारी सुरू आहे. पोलिसांचा वाढीव बंदोबस्त शहरात असून ठिकठिकाणी पोलिसांनी नाकाबंदी केली आहे. मंदिराकडे येणाऱ्या सर्व मार्गावर बॅरिगेट लावून रस्ते बंद केले. तरीही संचारबंदी असूनही अंबिका गरूड खुलेआम गांजा विक्री करत. स्थानिक पोलिसांना याबाबत खबर लागू नये, ही आश्चर्याची बाब म्हणावी लागेल. मात्र, पिंपरी पोलिस आयुक्तालयाच्या सामाजिक सुरक्षा विभागातील पोलिसांनी शुक्रवारी (ता.११) सायंकाळी छापा मारला.

छाप्यामधे चार लाख तीन हजार रुपयांचा सुमारे साडे पंचवीस किलो गांजा सापडला. आणि एक लाख बारा हजार रुपयांची रोख रक्कम सापडली. सोबत पावणे तेरा हजार रुपयांची विदेशी दारू आणि बियरच्या बाटल्याही सापडल्या. या कारवाईबाबत फिर्याद पोलिस हवालदार संदीप सोमनाथ गवारी यांनी दिली. अधिक तपास आळंदी पोलिस करत आहेत.  

- हे ही वाचा : कोरोनावर आयुर्वेदाची मात्रा; पुण्यातील वैद्यकीय तज्ज्ञांचे नेचर ट्रायलमध्ये रिसर्च पेपर प्रसिद्ध

संचारबंदीत वारकऱ्यांना वारीला येण्यास बंदी केली. मात्र एवढे पोलिस असूनही एवढ्या मोठ्या स्वरुपात गांजा विक्री चालू होती. याशिवाय आणखी काही ठिकाणी अवैधपणे दारूची विक्री होत आहे. गर्दुले आणि मद्यपी मात्र मोठ्या प्रमाणात वावरत आहेत. कार्तिकी वारीत संचारबंदीत ही अवस्था, तर इतरवेळी आळंदीत काय धंदे चालत असतील कल्पनाच करायला नको.

- पुण्याच्या बातम्या वाचण्यासाठी ► क्लिक करा 

(Edited by: Ashish N. Kadam)