समाविष्ट गावांचा आराखडा विकासकधार्जिणा

किरकटवाडी : पुणे महापालिकेत नव्याने समाविष्ट करण्यात आलेल्या नांदोशी- सणसनगर या गावांसाठी तयार केलेला विकास आराखडा बांधकाम व्यावसायिक धार्जिणा असून तो तयार करताना स्थानिक भौगोलिक परिस्थिती किंवा उपयुक्तता याचा विचार झालेला नाही, असा आरोप करत नागरिकांनी विकास आराखड्याला विरोध केला आहे. चुकीच्या पद्धतीने आरक्षणे टाकून केवळ बिल्डरांच्या जमिनींना फायदा होईल, असा आराखडा तयार करण्यात आल्याचाही आरोप नागरिकांनी केला.

नव्याने महापालिकेत समाविष्ट करण्यात आलेल्या गावांसाठी अनेक वर्षांच्या प्रतीक्षेनंतर पुणे महानगर प्रदेश विकास प्राधिकरणाने (पीएमआरडीए) ३० जुलैला विकास आराखडा जाहीर केला. यावर नागरिकांच्या हरकती व सूचना मागविण्यात आल्या आहेत. नांदोशी-सणसनगर येथील नागरिकांनी या विकास आराखड्याला तीव्र विरोध केला आहे. जेथे सार्वजनिक मालकीची जागा शिल्लक आहे, तेथे सर्व प्रकारच्या मूलभूत सुविधांसाठी आरक्षण टाकण्याऐवजी खासगी जमिनींवर मोठ्या प्रमाणात आरक्षण टाकण्यात आल्याने नागरिकांनी नाराजी व्यक्त केली आहे.

विशेष म्हणजे विकास आराखडा तयार करताना शेकडो एकर शेतजमीन आणि त्यासाठी आवश्यक रस्ते याचा विचार झाला नसून, बांधकाम व्यावसायिकांसाठी मात्र व्यवस्थित रस्त्यांची तजवीज केली आहे.

रस्ते केवळ बांधकाम व्यावसायिकांसाठीच

एकाच गटावर चार प्रकारचे आरक्षण टाकण्यात आले आहे. तीन ठिकाणी स्मशानभूमी असताना आणखी जेथे लोक राहण्यास आहेत तेथे स्मशानभूमीचे आरक्षण टाकण्यात आले आहे. सुपीक जमिनीवर शाळा, खेळाचे मैदान, दवाखाना असे आरक्षण टाकण्यात आले आहे. शेती आणि शेतकऱ्यांचा अजिबात विचार झाला नाही. जे नैसर्गिक ओढे आहेत ते न दाखवता राहत्या घरांवरून ओढे दाखवण्यात आले आहेत. रस्ते चुकीच्या पद्धतीने केवळ बांधकाम व्यावसायिकांच्या फायद्यासाठी टाकण्यात आले आहेत. शेतकऱ्यांना रस्ता उपलब्ध होईल याचा विचार विकास आराखडा तयार करताना केलेला नाही, असा आरोप नांदोशी-सणसनगरचे माजी सरपंच संदीप सणस यांनी केला आहे.

नांदोशी सणसनगर दृष्टिक्षेपात

• लोकसंख्या - ३०००

• क्षेत्रफळ - ३२८ हेक्टर

सद्यः स्थितीत

• प्राथमिक शाळा दोन - (१ ली ते ४थी)

• अंगणवाडी -दोन

• प्राथमिक आरोग्य उपकेंद्र- बंद

"ज्या शेतकऱ्यांना केवळ वीस गुंठे जमीन आहे, त्यावरही आरक्षण टाकण्यात आले आहे. अशाने शेतकरी भूमिहीन तर होणार आहेच, शिवाय उपजीविकेचाही गंभीर प्रश्न निर्माण होणार आहे."

- सतीश चौधरी, ग्रामस्थ, नांदोशी

"प्रत्यक्ष भौगोलिक परिस्थिती न पाहता अंदाजे विकास आराखडा तयार करण्यात आल्याचे दिसते. मुख्य गावठाणात वनीकरण झोन टाकण्यात आला आहे आणि जिकडे बांधकाम व्यावसायिकांनी मोठ्या प्रमाणात जमिनी खरेदी केलेल्या आहेत, तिकडे रहिवासी झोन टाकण्यात आला आहे. सर्व ग्रामस्थांचा या अन्यायकारक विकास आराखड्याला विरोध आहे."

- राजाराम वाटाणे, सरपंच, नांदोशी-सणसनगर