Pune News : जशास तसे उत्तर देऊ, पुणे महापालिका कर्मचाऱ्यांचा नीतेश राणेंना इशारा

पुणे : हिंदुत्ववादी संघटनांनी पुणे महापालिकेवर काढलेल्या मोर्चात आमदार नीतेश राणे यांनी महापालिका आयुक्त विक्रम कुमार व शहर अभियंता प्रशांत वाघमारे यांच्याबद्दल वक्तव्य केले. त्याविरोधात मंगळवारी (ता. ५) महापालिकेतील अधिकारी व कर्मचारी आक्रमक झाले. त्यांनी महापालिकेत निषेध सभा घेतली.

चुकीच्या पद्धतीने टीका केल्यास जशास तसे उत्तर दिले जाईल, असा इशारा त्यांनी दिला आहे. पुण्येश्‍वर मंदिराच्या ठिकाणी अतिक्रमण केल्याचा आरोप करत सोमवारी (ता. ४) हिंदुत्ववादी संघटनांनी महापालिकेवर मोर्चा काढला.

हे अतिक्रमण होत असताना महापालिकेच्या अधिकाऱ्यांनी दुर्लक्ष केल्याने राणे यांनी अधिकाऱ्यांवर शेरेबाजी केली. त्यांच्या निषेधार्थ मंगळवारी शहर अभियंता वाघमारे यांच्या नेतृत्वाखाली आंदोलन करण्यात आले.

यामध्ये आरोग्यप्रमुख डॉ. भगवान पवार, उपायुक्त सचिन इथापे, विद्युत विभागप्रमुख श्रीनिवास कंदूल, पाणीपुरवठा विभागप्रमुख अनिरुद्ध पावसकर, पथ विभागप्रमुख व्ही. जी. कुलकर्णी, उपायुक्त माधव जगताप, चेतना केरूरे, प्रतिभा पाटील, संदीप कदम, उपायुक्त किशोरी शिंदे, जयंत भोसेकर, संतोष वारुळे यांच्यासह कर्मचारी सहभागी झाले होते.

प्रशासनातील अधिकारी हे शहराच्या हितासाठी काम करत आहेत. नागरिकांची गैरसोय होणार नाही, यासाठी प्रयत्नशील असतात. महापालिका अधिकारी, कर्मचाऱ्यांवर हल्ले होतात, त्यावेळी बाहेरचे आमदार आमच्या मदतीला येत नाहीत.

महापालिकेवर काढलेल्या मोर्चात अधिकाऱ्यांबद्दल चुकीच्या भाषेत वक्तव्य करणे योग्य नाही. आमच्या चुका असतील, तर आम्ही सुधारू. पातळी सोडल्यास शांत बसणार नाहीत. जशास तसे उत्तर देऊ, आमच्यावर गुन्हे दाखल झाले तरी चालतील, असा इशारा अधिकाऱ्यांनी दिला.

महापालिकेसमोर झालेल्या आंदोलनात धार्मिक तेढ निर्माण करणारे वक्तव्य केल्याप्रकरणी आमदार नीतेश राणे आणि महेश लांडगे यांच्याविरुद्ध गुन्हा दाखल करावा, अशी मागणी काही संघटनांच्या शिष्टमंडळाने पोलिस आयुक्त रितेश कुमार यांच्याकडे मंगळवारी निवेदनाद्वारे केली. या वेळी शिष्टमंडळात विविध संघटनांचे ६० प्रतिनिधी उपस्थित होते.