PMPML CNG Bus Fire : कात्रज चौकात पीएमपीच्या सीएनजी बसला आग

कात्रज : कात्रज चौकात रात्रीच्या वेळी उभा करण्यात आलेल्या पीएमपीच्या सीएनजी बसला आग लागल्याची घटना गुरुवारी मध्यरात्री बारा वाजण्याच्या सुमारास घडली. कात्रज अग्निशमन दलाकडून ही आग आटोक्यात आणण्यात आली.

त्यामुळे मोठी दुर्घटना टळली. दिवसभर शहरात प्रवास करुन कात्रज डेपोच्या बस कात्रज चौकात पार्क केल्या जातात. त्यातील एका बसला ११ वाजण्याच्या सुमारास चालक उभी करुन निघून गेला. त्यानंतर काही वेळातच बोनेटमधून धूर येत असल्याचे रखवालदाराच्या निदर्शनास आले. त्यांनी याची माहिती तत्काळ कात्रज अग्निशमन दलाला दिली.

अग्निशमन दलाकडून तत्काळ कारवाई करत आग आटोक्यात आणण्यात आली. यामध्ये कोणही जखमी झाले नाही. आगीचे कारण समजू शकले नसल्याचे कात्रज अग्निशमन दलाकडून सांगण्यात आले. वेळेत आग आटोक्यात आणल्याबद्दल कात्रज अग्निशमन दलाचे स्थानिकांकडून कौतुक करण्यात येत आहे.