Pune Crime: रेल्वे स्थानकावर साहित्य तपासणीच्या नावाखाली प्रवाशांना लुबाडणाऱ्या सहायक पोलिस उपनिरीक्षकासह सहा कर्मचाऱ्यांना निलंबित केले आहे. या घटनेमुळे लोहमार्ग पोलिसांचा कारभार चव्हाट्यावर आला आहे.
सहायक पोलिस उपनिरीक्षक बाळू पाटोळे (एलसीबी, पुणे लोहमार्ग), पोलिस हवालदार सुनील व्हटकर (एलसीबी, पुणे लोहमार्ग), पुणे लोहमार्ग पोलिस ठाण्यातील प्रशांत बजरंग डोईफोडे, जयंत गणपत रणदिवे, अमोल युवराज सोनवणे आणि विशाल दत्तात्रेय गोसावी अशी निलंबित केलेल्या सहा पोलिस कर्मचाऱ्यांची नावे आहेत.
पुणे रेल्वे स्थानकावर घातपाती कारवायांच्या पार्श्वभूमीवर या कर्मचाऱ्यांकडे प्रवाशांचे साहित्य तपासण्याचे काम होते. त्यांनी तीन एप्रिल रोजी दुपारी एका तरुणासह त्याच्या मैत्रिणीला अडवले. बॅगेत गांजा असल्याच्या संशयावरून त्यांची चौकशी केली. या दोघांना लोहमार्ग पोलिस ठाण्यातील वरिष्ठ निरीक्षकांसमोर हजर केले. त्याची नोंद स्टेशन डायरीत करून त्यांना सायंकाळी सोडून दिले.
दरम्यान, लोहमार्ग पोलिसांनी तरुण आणि त्याच्या मैत्रिणीकडून पाच लाख रुपये घेतले, अशी माहिती मुंबईच्या लोहमार्ग पोलिस महासंचालक कार्यालयातून पुणे लोहमार्गचे प्रभारी पोलिस अधीक्षक राजेश बनसोडे यांना कळविली. बनसोडे यांनी या प्रकरणाची चौकशी करून अहवाल सादर करण्याचे आदेश पोलिस निरीक्षक इरफान शेख यांना दिले.
त्यानुसार रेल्वे फलाटावरील सीसीटीव्ही चित्रीकरण तपासले. चौकशीनंतर बनसोडे यांनी या सहा कर्मचाऱ्यांवर बेजबाबदार वर्तन केल्याचा ठपका ठेवत निलंबित करण्याचे आदेश दिले. यापैकी एकावर प्रवाशांचे साहित्य तपासणीत गैरप्रकार केल्यामुळे जबरी चोरीचा गुन्हा दाखल होता. तरीही त्याची रेल्वे स्थानकात नियुक्ती केल्याचे समोर आले आहे.
उडवाउडवीची उत्तरे
या प्रकाराची माहिती घेत असताना कोणी वरिष्ठ अधिकारी रजेवर आहे तर, कोण प्रशिक्षणासाठी गेल्याचे समोर आले. पुणे लोहमार्ग पोलिस ठाण्यातील कर्मचाऱ्यांना त्यांचे वरिष्ठ अधिकारी कोण आहेत, निलंबित कर्मचाऱ्यांची नावे याबाबत विचारले असता त्यांनी उडवाउडवीची उत्तरे दिली.
या निलंबित कर्मचाऱ्यांकडे अनेक महिन्यांपासून प्रवाशांचे साहित्य तपासणीचे काम होते. त्यांना कोणाच्या सांगण्यावरून हे काम दिले गेले, हे गुलदस्तातच आहे, तसेच विशेष म्हणजे जून २०२१ मध्ये अमली पदार्थ प्रकरणात गैरप्रकार केल्याप्रकरणी तत्कालीन वरिष्ठ निरीक्षकांसह सात पोलिसांना बडतर्फ केले होते. या घटनेवरून प्रवाशांना लुबाडण्याचे काम सुरूच असल्याचे समोर आले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
