भीमाशंकर कारखान्याचे तीन जागांसाठी स्थगित झालेले मतदान रविवारी होणार

पारगाव - दत्तात्रयनगर (पारगांव, ता. आंबेगाव) येथील भीमाशंकर सहकारी साखर कारखान्याच्या पंचवार्षिक निवडणूक सन २०२२- २७ साठीच्या एकूण २१ जागांपैकी १८ जागा बिनविरोध झाल्या होत्या. शिंगवे-रांजणी गटातील फक्त तीन जागांसाठी होणारी मतदान प्रक्रिया राज्यातील अतिवृष्टीचे कारण देत राज्य आपत्ती व्यवस्थापन प्राधिकरणाच्या अहवालानुसार शासनानाच्या आदेशाने निवडणूका ज्या टप्यावर आहे. त्या टप्यावर पुढे ढकलण्यात आली होती ते मतदान आता रविवार दि.१६ रोजी होणार आहे.

भीमाशंकर सहकारी साखर कारखान्याच्या पंचवार्षिक निवडणुकीसाठी एकूण २१ जागांपैकी भीमाशंकर कारखान्याचे संस्थापक माजी गृहमंत्री दिलीप वळसे-पाटील यांच्यासह राष्ट्रवादी कॉंग्रेसचे एकूण १८ उमेदवार बिनविरोध निवडून आले आहेत. तर शिंगवे-रांजणी गटात तीन जागांसाठी तुकाराम बाबुराव गावडे यांच्यासह राष्ट्रवादी कॉंग्रेसच्या वतीने भीमाशंकर कारखान्याचे माजी अध्यक्ष देवदत्त निकम, बाबासाहेब खालकर, दादाभाऊ पोखरकर हे तिन्ही विद्यमान संचालक रिंगणात असल्याने तीन जागांच्या निवडणुकीसाठी रविवार (दि. १७) जुलै रोजी मतदान होणार होते. प्रशासनाच्या वतीने मतदानाची सर्व तयार पूर्ण करण्यात आली होती.

मतदान अवघे एक दिवसावर आले असतांना, त्यावेळी राज्यातील बहुतांश भागात सुरू असलेल्या मुसळधार पावसामुळे राज्य आपत्ती व्यवस्थापन प्राधिकरणाच्या अहवालानुसार राज्यातील बहुतांश भागात सुरू असलेल्या मुसळधार पावसामुळे जनजीवन तसेच वाहतुक व्यवस्था विस्कळीत झालेली आहे. त्यामुळे राज्यातील सर्व सहकारी संस्थांच्या निवडणूका ज्या टप्यावर असतील त्या टप्यावर पुढे ढकलण्यात आल्या होत्या. त्या आदेशानुसार भीमाशंकर सहकारी साखर कारखान्याची निवडणूक पुढे ढकलण्यात आली होती.

त्यामुळे शिंगवे -रांजणी गटातील तीन जागांसाठी होणारी निवडणूक स्थगित झाली होती. आता निवडणूक प्रक्रिया स्थगित झालेल्या टप्प्यापासून पुढे सुरु करण्यात आली असून, मतदान रविवार (दि.१६) रोजी सकाळी ७ ते सायंकाळी ५ वाजेपर्यंत होणार आहे. व मतमोजणी सोमवार (दि. १७) रोजी सकाळी ८ वाजता तालुका क्रीडा संकुल (मंचर) येथे होणार असल्याचा निवडणूक कार्यक्रम प्रांतअधिकारी तथा निवडणूक निर्णय अधिकारी सारंग कोडोलकर यांनी प्रसिध्द केला आहे.