Pune Dam Water Level : चार धरणात मिळून, अर्धा टीएमसीची वाढ

खडकवासला : खडकवासला धरण साखळीत मागील आठवड्यात कमी अधिक प्रमाणात पावसाला सुरवात झाली. या चार- पाच दिवसात सुमारे चार ही धरणात मिळून अर्धा टीएमसीची वाढ झाली आहे.

वरसगाव धरणातून वीज निर्मितीसाठी ६०० क्युसेकचा विसर्ग सुरु होता. वरसगाव धरण आज गुरुवारी दुपारी बारा वाजता १०० टक्के भरले. त्यातून ५९७ क्युसेक पाणी सांडव्यातून मोसे नदीत सोडले. वरसगाव मधून एकूण एक हजार १९७ क्युसेक पाणी सोडले आहे.

अशाच प्रकारे पानशेत धरणातून वीज निर्मितीसाठी ६०० क्युसेकचा विसर्ग सुरु होता. पानशेत धरण आज गुरुवारी १०० टक्के भरले. त्यातून संध्याकाळी सात वाजता ६८३ क्युसेक पाणी सांडव्यातून अंबी नदीत सोडले. पानशेतमधून एकूण एक हजार २८३ क्युसेक पाणी सोडले आहे. तसेच, टेमघर धरणातून ३५० क्युसेकचा विसर्ग वीज निर्मितीसाठी सुरु आहे.

गुरुवारी सकाळी सहा वाजता संध्याकाळी पाच वाजेपर्यंत खडकवासला येथे किरकोळ पाऊस झाला. पानशेत येथे दोन, वरसगाव येथे एक, टेमघरला पाच मिलिमीटर पाऊस पडला आहे. दरम्यान, आज अखेर शहराला पाणी पुरवठा करणाऱ्या खडकवासला धरणात १.१२ टीएमसी म्हणजे ५६.८२ टक्के पाणीसाठा आहे.

पानशेत मध्ये १०.६५ टीएमसी म्हणजे १०० टक्के पाणी जमा झाले आहे. वरसगाव धरणात १२.८२ टीएमसी १०० टक्के धरण भरले आहे. तर टेमघर धरणात २.८२ टीएमसी म्हणजे ७५.९७टक्के पाणीसाठा जमा झाला आहे. तर चारही धरणात २७.४१ टीएमसी म्हणजे ९४.०२ टक्के धरण भरलेले आहे.

पानशेत मधून एक हजार २८३ क्युसेक, वरसगाव मधून एकूण एक हजार १९७ क्युसेक व टेमघर मधून ३५० क्युसेक पाणी सोडले आहे. या तिन्ही धरणातून सोडलेले दोन हजार ८२० क्युसेक पाणी खडकवासला धरणात जमा आहे. तर खडकवासला धरणातून शेतीसाठी १००५ क्युसेक पाणी सोडले जात आहे.