Pune : बार्टी आणि वाडिया महाविद्यालय यांच्यात सामंजस्य करार; स्पर्धा परीक्षांचे मिळणार मोफत प्रशिक्षण

Pune - डॉ. बाबासाहेब आंबेडकर संशोधन व प्रशिक्षण संस्थेच्या वतीने (बार्टी) अनुसूचित जातीतील विद्यार्थ्यांसाठी बॅंक, रेल्वे, एलआयसी आणि इतर परीक्षांसाठी पूर्व प्रशिक्षण कार्यक्रम आयोजित केला आहे. हा कार्यक्रम नेस वाडिया वाणिज्य महाविद्यालयात पुढील सहा महिने कालावधीसाठी राबविण्यात येणार आहे.

बार्टी ही सामाजिक न्याय आणि विशेष साहाय्य विभागाची स्वायत्त संस्था आहे. या संस्थेमार्फत राज्यातील अनुसूचित जातीतील विद्यार्थ्यांसाठी बँक, रेल्वे एल आय सी आणि इतर परीक्षा (आयबीपीएस) तसेच पोलिस आणि लष्कर भरती पूर्व प्रशिक्षण कार्यक्रम राबविण्यात येतात.

आयबीपीएसमार्फत प्रोबेशनरी ऑफिसर/मॅनेजमेंट ट्रेनी, विशेष अधिकारी अशा पदांसाठी जाहिरात प्रसिद्ध झाली आहे.

त्या अनुषंगाने संबंधित परीक्षेत अनुसूचित जातीतील विद्यार्थ्याचा टक्का वाढविण्यासाठी बार्टी आणि मॉडर्न एज्युकेशन सोसायटीच्या नेस वाडिया वाणिज्य महाविद्यालयांशी सामंजस्य करार करण्यात आला आहे. या करारानुसार विद्यार्थ्यांना मोफत प्रशिक्षण दिले जाणार आहे, अशी माहिती ‘बार्टी’चे  महासंचालक सुनील वारे यांनी दिली.

या प्रशिक्षणासाठी २५ ऑगस्टपर्यंत अर्ज करता येणार असून प्रवेश परीक्षा १० सप्टेंबर रोजी नेस वाडिया महाविद्यालयात आयोजित केली आहे. हा प्रशिक्षण कार्यक्रम महाविद्यालयाच्या प्राचार्या डॉ. वृषाली रणधीर, डॉ. लक्ष्मण भैसाने, सहाय्यक प्राध्यापक आणि समन्वयक यांच्या मार्गदर्शनाखाली राबविण्यात येणार आहे.

प्रशिक्षणासाठी ३० टक्के जागा महिलांसाठी, चार टक्के जागा ‘दिव्यांग’ विद्यार्थ्यांसाठी, पाच टक्के जागा अनुसूचित जाती अंतर्गत वंचित जाती मधील विद्यार्थ्यांसाठी आरक्षित असणार आहेत.

प्रशिक्षण कार्यक्रमाचे स्वरूप -

- विद्यार्थ्यांना प्रती महिना सहा हजार रुपये विद्यावेतन

- शैक्षणिक साहित्यासाठी एकरकमी पाच हजार रुपये

- पात्रता : १२ वी उत्तीर्ण

- विद्यार्थी संख्या : १००

- प्रशिक्षण कालावधी : सहा महिने

- अधिक माहितीसाठी संकेतस्थळ : https://barti.maharashtra.gov.in/