Pune Cold : पुणे शहर पुन्हा गारठले; पाषाणमध्ये सर्वांत कमी १०.४ अंश सेल्सिअस तापमान

पुणे - पुण्यात यंदाच्या हिवाळ्यातील नीचांकी किमान तापमानाची नोंद बुधवारी (ता. २०) झाली. मंगळवारच्या तुलनेत बुधवारी सकाळी किमान तापमानाचा पारा ३.२ अंश सेल्सिअसने घसरला. अवघ्या तीन दिवसांमध्ये पुण्यात यंदाच्या हिवाळ्यातील नीचांकी किमान तापमानाची नोंद झाली. शिवाजीनगर येथे किमान तापमान १२ अंश सेल्सिअस, तर सर्वांत कमी तापमान पाषाण येथे १०.४ अंश सेल्सिअस होते.

पुण्यात गेल्या गुरुवारी (ता. १४) १४ अंश सेल्सिअस तापमानाची नोंद झाली. त्यानंतर हवेतील गारठा वाढला. रात्री थंडीत वाढ झाली. त्यामुळे शुक्रवारी (ता. १५) आणि शनिवारी (ता. १६) किमान तापमान अनुक्रमे १२.३ आणि १२ अंश सेल्सिअस नोंदले गेले. त्यानंतर शहरातील गारठा कमी होऊन किमान तापमानाचा पारा पुन्हा वाढला. गेल्या तीन दिवसांमध्ये रविवारी (ता. १७) १३.२, सोमवारी (ता. १८) १४.५ आणि मंगळवारी (ता. १९) १५.२ अंश सेल्सिअस इतके किमान तापमान नोंदले गेले. मात्र अवघ्या चोवीस तासांमध्ये किमान तापमान पुन्हा १२ अंश सेल्सिअसपर्यंत घसरले. ही यंदाच्या हिवाळ्यातील सर्वांत थंड रात्री म्हणून नोंद झाली.

पुढील दोन दिवसांमध्ये आकाश मुख्यतः निरभ्र राहणार असून हवेतील गारठा वाढेल, असा अंदाज हवामान खात्याने बुधवारी वर्तविला. पुढील ४८ तासांमध्ये किमान तापमानाचा पारा ११ अंश सेल्सिअसपर्यंत कमी होईल, असेही त्यांनी स्पष्ट केले. उत्तर भारतातून येणाऱ्या थंड वाऱ्याच्या प्रभावामुळे शहरात गारठा वाढत आहे.

शहरात डिसेंबरमधील सर्वाधिक थंड रात्र

(किमान तापमान अंश सेल्सिअसमध्ये)

• २७ डिसेंबर १९६८ ...................... ३.३

• ११ डिसेंबर १९७० .......................३.६

• १३ डिसेंबर १९७० ....................... ३.९

• १० डिसेंबर १९७० ........................ ४

• ९ डिसेंबर १९७० ...........................४.४

• १ डिसेंबर १९७० .......................... ४.६

• ११ डिसेंबर १९८१ ........................ ४.७

• २६ डिसेंबर १९७५ ........................ ४.८

• १२ डिसेंबर १९८१ ......................... ५

• ८ डिसेंबर १९७० ............................ ५.१