Pune Crime : कोथरूडमधील व्यावसायिकाला १५ लाखांच्या खंडणीसाठी धमकी

पुणे - गायक सिद्धू मुसेवाला हत्या प्रकरणातील आरोपी संतोष जाधव या सराईत गुन्हेगाराच्या नावाने कोथरूडमधील एका व्यावसायिकाकडे खंडणी मागितल्याचा प्रकार उघडकीस आला. या प्रकरणी गुन्हे शाखेने दोघांना ताब्यात घेतले आहे.

या प्रकरणी एका व्यावसायिकाने कोथरुड पोलिस ठाण्यात फिर्याद दिली आहे. खोदकामासाठी जेसीबी पुरविण्याचा त्यांचा व्यवसाय आहे. कोथरुडमधील घरी असताना त्यांना शनिवारी रात्री अनोळखी क्रमांकावरुन दूरध्वनी आला. ‘मी संतोष जाधव बोलत आहे. पंजाबमधील सिद्धू मुसेवाला हत्या प्रकरण माहीत आहे का? जीव वाचवायचा असेल तर १५ लाख रुपये खंडणी दे, अन्यथा गोळ्या घालीन’, अशी धमकी देण्यात आली.

या धमकीमुळे व्यावसायिकाने कोथरूड पोलिस ठाण्यात तक्रार दिली. या प्रकरणी पोलिसांनी गुन्हा दाखल केला. गुन्हे शाखेच्या पोलिसांनी तपास सुरू केला. धमकीचा आलेल्या मोबाईल क्रमांकावरून तांत्रिक पडताळणी करण्यात आली. पोलिसांनी संशयावरून दोघांना ताब्यात घेतले आहे. दरम्यान, पुणे ग्रामीण पोलिसांनी संतोष सुनील जाधव (वय २८, रा. पोखरी, ता. आंबेगाव) याच्यासह टोळीतील सहा जणांविरुद्ध जुलै महिन्यात महाराष्ट्र संघटित गुन्हेगारी नियंत्रण कायद्यान्वये (मोका) कारवाई केली आहे. जाधव सध्या कारागृहात आहे.