Pune Crime : पोलिसांच्या सतर्कतेमुळे उधळला खुनाचा कट

Pune Crime - लोणी काळभोर (ता. हवेली) पोलिस ठाण्यातील रेकॉर्डवरील गुन्हेगाराने रचलेला खुनाचा कट लोणी काळभोर पोलिसांच्या सतर्कतेमुळे उधळण्यात आला. प्रणव भारत शिरसाट (वय २२, रा. आंग्रे वस्ती, लोणी काळभोर, ता. हवेली), अभिजित अभिमन्यू आहेरकर (वय २२, कन्या शाळेजवळ, लोणी काळभोर) असे अटक केलेल्या आरोपींचे नावे आहेत.

पोलिसांनी दिलेल्या माहितीनुसार, लोणी काळभोर पोलिस ठाण्यातील रेकॉर्डवरील गुन्हेगार अभिषेक दत्तात्रय रामपुरे यास रेकॉर्डवरील आरोपी अक्षय कांबळे याने काही दिवसांपूर्वी मारहाण केली होती. अभिषेक हा लोणी काळभोर पोलिस ठाण्यातील तडीपार गुन्हेगार प्रणव शिरसाट याच्या टोळीचा सदस्य असल्याने त्यांची पुन्हा भांडणे होऊन गंभीर गुन्हा घडण्याची शक्यता होती.

पिस्तूल व कोयत्यासारखी घातक हत्यार घेऊन खुनाच्या उद्देशाने कदमवाकवस्ती परिसरात प्रणव शिरसाट येणार असल्याची माहिती लोणी काळभोर पोलिसांना मिळाली. त्यानुसार पोलिसांनी कदमवाकवस्ती येथे तपासणी केली असता, येथील पालखी विसावा शेडच्या जवळ टोळी प्रमुख प्रणव शिरसाट व अभिजित आहेरकर हे दोघे मोटारसायकलवर थांबले

पोलिसांना पाहून त्यांनी पळ काढला होता. तेव्हा त्यांचा पाठलाग करून पोलिसांनी त्यांना ताब्यात घेतले. दरम्यान, त्यांची झडती घेतली असता त्यांच्याकडून एक गावठी बनावटीचे पिस्तूल, एक जिवंत काडतूस, तीन लोखंडी कोयते, असा एकूण १०, ८००/- रुपये किमतीचा मुद्देमाल जप्त करण्यात आला.

पोलिसांनी आरोपींकडे अधिक चौकशी केली असता, प्रणव शिरसाट याने अभिजित आहेरकर, अभिषेक रामपूर व त्याच्या टोळीतील इतर सदस्यांच्या साथीने अक्षय कांबळे याचा खून करण्याचा कट रचला असल्याची माहिती पोलिसांना दिली. वरिष्ठ पोलिस निरीक्षक दत्तात्रेय चव्हाण यांच्या मार्गदर्शनाखाली पोलिस उपनिरीक्षक अमित गोरे यांनी ही कामगिरी केली.