Pune Crime: बिबवेवाडीत सुरक्षारक्षकावर कोयत्याने वार, दोघांना अटक

Latest Pune News : दोघा तरुणांनी सुरक्षारक्षकावर कोयत्याने वार करून गंभीर जखमी केल्याची घटना बिबवेवाडीतील रम्यनगरी सोसायटीमध्ये घडली. या घटनेनंतर पोलिसांनी दोघा तरुणांना अटक केली.

नथू दिनकर सुर्वे (वय ५८, रा. पापळवस्ती, बिबवेवाडी) असे जखमी झालेल्या सुरक्षारक्षकाचे नाव आहे. याबाबत सुर्वे यांनी बिबवेवाडी पोलिस ठाण्यात फिर्याद दिली आहे. प्रतीक सुभाष बिबवे (वय २५, रा. मार्केट यार्ड) आणि क्षितीज विनायक जैनक (वय २१, रा. नवी पेठ) या संशयितांना अटक केली आहे.

पोलिसांनी दिलेल्या माहितीनुसार, सुरक्षारक्षक सुर्वे रात्री सोसायटीच्या परिसरात दुकानाजवळ झोपतात. काही दिवसांपूर्वी प्रतीक आणि क्षितीज हे दोघे रम्यनगरी सोसायटीतील मित्रासमवेत बोलत थांबले होते. त्यावेळी सुर्वे यांनी दोघांना हटकले होते.

त्यांनी सोसायटीजवळ गोंधळ घालू नका, असे दोघांना सांगितले होते. त्याचा राग मनात धरून दोघांनी मंगळवारी मध्यरात्री झोपेत असलेल्या सुर्वे यांच्या हातावर आणि डोक्यावर कोयत्याने वार केले. या मारहाणीत सुर्वे यांच्या डोक्याला गंभीर दुखापत झाली आहे. या घटनेनंतर पसार झालेल्या आरोपींना पोलिसांनी अटक केली. पुढील तपास पोलिस उपनिरीक्षक अशोक येवले करीत आहेत.