Pune News: पत्नीशी फोनवर बोलत असल्याच्या कारणातून झालेल्या वादात दोघांनी एकमेकावर कोयत्याने वार करत खूनाचा प्रयत्न केला. या हल्ल्यात दोघेही रक्तबंबाळ झाले आहेत. शुक्रवारी (ता.२९) दुपारी साडे तीन वाजताच्या सुमारास पांडवनगरमधील गोलंदाज चौकाजवळ ही घटना घडली.
सद्या दोघांवर रुग्णालयात उपचार सुरू असल्याचे पोलिसांनी सांगितले. वार करणारे दोघेही एकमेकांच्या ओळखीचे आहेत. या प्रकरणी, चतुःश्रृंगी पोलिस ठाण्यात परस्परविरोधी गुन्हे दाखल करण्यात आले आहेत.
किशोर गोविंद धोत्रे (वय ३६, रा.वैदुवाडी पोलिस चौकीसमोर, शंकरमठ हडपसर) यांनी दिलेल्या फिर्यादीनुसार, शंकर मिरेकर (वय ४५, रा.वडारवाडी) याच्यावर खूनाचा प्रयत्न केल्याचा गुन्हा दाखल करण्यात आला आहे.
पोलिसांनी दिलेल्या माहितीनुसार, मिरेकर हा त्यांच्या पत्नीशी फोनवर बोलतो, असा संशय फिर्यादी यांना होता. त्याबाबत चर्चा करण्यासाठी फिर्यादी पांडवनगर येथे आले होते. त्यावेळी दोघांत वाद झाला झाला.
मिरेकर याने फिर्यादीला शिवीगाळ करून जमिनीवर ढकलून दिले. त्यानंतर मिरेकर याचा मुलगा आणि मुलाचा मित्र तेथे आले. त्यांनी फिर्यादींवर कोयत्याने वार करून लाकडी बॅटने मारहाण केल्याचे फिर्यादीत नमूद आहे.
शंकर बादशहा मिरेकर (वय ४२, रा. जुनी वडारवाडी) यांनी दिलेल्या फिर्यादीनुसार चतुःश्रृंगी पोलिसांनी किशोर धोत्रे याच्यावर खूनाचा प्रयत्न केल्याचा गुन्हा दाखल केला आहे. पोलिसांनी दिलेल्या माहितीनुसार, मिरेकर यांना धोत्रे याने चहा पिण्यासाठी बोलावून घेतले होते.
त्यावेळी धोत्रे याने पूर्वीचा वाद मनात धरून लोखंडी वस्तू मिरेकर याच्या पायावर आणि मानेवर खुपसली. या हल्ल्यात मिरेकर गंभीर जखमी झाले आहेत. त्यांनी दिलेल्या फिर्यादीनुसार पोलिसांनी धोत्रेवर खूनाचा प्रयत्न केल्याचा गुन्हा दाखल केला आहे.
भरदिवसा झालेल्या या मारहाणीचा थरार रस्त्यावर सुरू होता. दोघे एकमेकांनी केलेल्या मारहाणीत रक्तबंबाळ झाले होते. हा प्रकार रस्त्यावरून जाणाऱ्या एकाने मोबाईलच्या कॅमेऱ्यात कैद केला होता. त्यांचा व्हीडीओ मोठ्या प्रमाणात व्हायरल झाला आहे.
घटनेची माहिती मिळताच पोलिस उपायुक्त विजयकुमार मगर, सहायक पोलिस आयुक्त आरती बनसोडे, वरिष्ठ पोलिस निरीक्षक अजय कुलकर्णी, गुन्हे निरीक्षक युवराज नांद्रे, सहायक पोलिस निरीक्षक बाबासाहेब झरेकर यांनी घटनास्थळी भेट दिली.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.