पुणे : अमृततुल्यची पाणीपट्टी माफ करण्याची मागणी

पुणे - लॉकडाऊच्या (Lockdown) काळात शहरातील अमृततुल्य चहाची दुकाने (Tea Shop) बंद असून देखील महापालिकेच्या (Municipal) पाणी पुरवठा विभागाने या दुकानांना १४ महिन्यांची पाणीपट्टी (Water tax) भरण्याचे आदेश दिले आहेत. ही पाणीपट्टी अन्यायकारक असून, ती रद्द करण्याची मागणी अमृततुल्य व्यावसायिकांनी केली आहे.

लॉकडाऊनच्या काळात शहरातील सर्व दुकाने बंद होती, त्यामध्ये अमृततुल्य दुकानांचाही समावेश आहे. महापालिकेकडून अमृततुल्य चहा व्यावसायिकांना दर महिन्याला १ हजार ८० रुपये रुपये पाणी पट्टी आकारली जाते. मार्च २०२० महिन्यापासून लॉकडाऊन सुरू झाल्यानंतर मे २०२१ या कालावधीपर्यंत कधी पूर्ण तर कधी अर्धा दिवस तर कधी सायंकाळी सात पर्यंत दुकाने उघडी ठेवण्यास परवानगी होती. त्याचा परिणाम चहा विक्रीच्या व्यवसायावर झालेला आहे. असे असताना पाणी पुरवठा विभागाने मार्च २०२० ते मे २०२१ या १४ महिन्याच्या कालावधीतील पाणी पट्टी भरण्यासाठी अमृततुल्य व्यावसायिकांना बिल पाठविण्यात आले आहे.

त्यामुळे प्रत्येक व्यावसायिकास १५ हजार रुपयांचा भुर्दंड पडणार आहे, असे पुणे शहर अमृततुल्य व्यावसायिक असोसिएशनचे अध्यक्ष अजित वोरा यांनी सांगितले.

ही पाणीपट्टी रद्द करावी अशी मागणी खासदार गिरीश बापट यांच्याकडे करण्यात आली आहेत. त्यांनीही पाणी पुरवठा विभागाचे प्रमुख अनिरुद्ध पावसकर यांना यांना पत्र लिहून या विषयात लक्ष घालण्याचे निर्देश दिले आहेत. तसेच असोसिएशनने देखील महापालिका आयुक्त, स्थायी समिती अध्यक्षांना पत्र लिहून पाणी पट्टी माफ करण्याची मागणी केली आहे.