कोरोनाच्या तिसऱ्या लाटेत पुणे जिल्ह्यात गुरुवारी सर्वाधिक १८ रुग्णांच्या मृत्यू

पुणे - पुणे जिल्ह्यात (Pune District) गुरुवारी (Thursday) (ता. ३) दिवसात कोरोनाच्या तिसऱ्या लाटेतील (Third Wave) सर्वाधिक १८ कोरोना रुग्णांच्या मृत्यूची (Death) नोंद झाली. दिवसातील एकूण मृत्यूमध्ये पुणे शहरातील नऊ, पिंपरी चिंचवड (Pimpri Chinchwad) व जिल्हा परिषद कार्यक्षेत्रातील प्रत्येकी चार मृत्यू आहेत. नगरपालिका हद्दीत एका रुग्णाचा कोरोनाने मृत्यू झाला आहे. दरम्यान, गुरुवारी दिवसभरात जिल्ह्यात ४ हजार १४९ नवीन कोरोना रुग्ण आढळून आले असून,याउलट ८ हजार ८६ जण कोरोनामुक्त झाले आहेत. जिल्हा आरोग्य विभागाच्यावतीने प्रसिद्ध करण्यात आलेल्या कोरोना आकडेवारी अहवालातून हे उघड झाले आहे.

जिल्ह्यातील दिवसातील एकूण नवीन रुग्णांमध्ये पुणे शहरातील सर्वाधिक २ हजार १४१ रुग्ण आहेत. दिवसात पिंपरी चिंचवडमध्ये १ हजार ८४, जिल्हा परिषद कार्यक्षेत्रात ७११, नगरपालिका हद्दीत १६१ आणि कॅंटोन्मेंट बोर्ड क्षेत्रात ५२ नवे रुग्ण आढळून आले आहेत. एकूण कोरोनामुक्तांमध्येही पुणे शहरातील सर्वाधिक ४ हजार १३६ जण आहेत. पिंपरी चिंचवडमधील २ हजार ३८३, जिल्हा परिषद कार्यक्षेत्रातील १ हजार २०२, नगरपालिका हद्दीतील २७५ आणि कॅंटोन्मेंट बोर्ड क्षेत्रातील ९० जण दिवसभरात कोरोनामुक्त झाले आहेत.