Pune Drugs Case: 'एल थ्री'मधील पार्टीत ड्रग्ज पुरवणाऱ्याला पुणे पोलिसांकडून बेड्या

पुण्यातील फर्ग्यूसन रस्त्यावरील एल थ्री हॉटेलमध्ये झालेल्या पार्टीत ड्रग्ज पुरवठा करणाऱ्या पेडलरला पुणे पोलिसांनी बेड्या ठोकल्या आहे. अभिषेक असे या ड्रग पेडलरचे नाव आहे. गेल्या आठवड्या या हॉटेलमधील एक व्हिडिओ व्हायरल झाला होता. ज्यामध्ये दोन तरूण हॉटेलच्या वॉशरूममध्ये ड्रग्जचे सेवन करत असल्याचे दिसत होते.

हा व्हिडिओ व्हायरल झाल्यानंतर पुणे पोलिसांनी कडक पाऊले उचलत त्या तरुणांना अटक केली होती. याचबरोबर उत्पादन शुल्क विभागाने या प्रकरणी हॉटेलवर कारवाई केली होती.

दरम्यान पोलीस उपायुक्त संदीपसिंग गिल यांनी दिलेल्या माहितीनुसार, "पार्टीला उपस्थित असणाऱ्या ४० ते ४५ मुलांची चौकशी सुरू करण्यात आली आहे. अमली पदार्थ सेवन करणाऱ्या तरुणांनी त्या रात्री ८० ते ८५ हजार रुपयांचा खर्च केल्याची माहिती मिळाली आहे. हॉटेलमध्ये काही अल्पवयीन मुले असल्याची शक्यता आहे. त्या रात्री तेथे असलेल्या ४० ते ४५ तरुणांची चौकशी सुरू करण्यात आली असून, त्यादृष्टीने पोलिसांकडून तपास करण्यात येत आहे.

पोलिसांनी दिलेल्या माहितीनुसार, पुण्यातील बार आणि पब सकाळी 1.30 वाजेपर्यंत सुरू ठेवण्याची परवानगी असताना हा बार रविवारी पहाटे ५ वाजेपर्यंत सुरू होता. येथे परवानगीपेक्षा जास्त दारू विक्री केली जात होती.

आता राज्य उत्पादन शुल्क विभागाने सांगितले की, त्यांनी लिक्विड लेझर लाउंज (L3) चा परवाना निलंबित केला आहे आणि मद्य साठा नियमांचे उल्लंघन केल्याच्या आरोपाखाली सहा वेटर्सना अटक केली आहे.