पुणे : कोथरुडमध्ये विसर्जन स्थळी गर्दीला उधाण

कोथरुड : बाप्पाला निरोप देताना आपली हजेरी हवीच या भावनेतून सहकुटूंब, सहपरिवार, मित्रांसह गणेशाला निरोप द्यायला आलेल्या गर्दीचे उधाण सायंकाळी चार नंतर विसर्जन स्थळी संध्याकाळच्या सुमारास दिसत होते. सकाळी विसर्जनासाठी येणारांची संख्या कमी होती. दुपारनंतर हळुहळु गर्दी वाढु लागली. कोरोना निर्बंधांचे पालन होईल याकडे महानगरपालिकेचे आरोग्य कर्मचारी, स्वयंसेवक, पोलिस यांचा कटाक्ष होता. तर भाविक सुध्दा  मास्कचा वापर करत विसर्जन विधीत सहभागी होताना दिसत होते.

कोथरुड बावधन क्षेत्रिय कार्यालया अंतर्गत १९ मुर्ती व निर्माल्य संकलन केंद्रे तसेच १० फिरत्या हौदांची व्यवस्था करण्यात आली होती. घरगुती गणपती विसर्जनासाठी ९००० किलो पावडरची व्यवस्था कोथरुड क्षेत्रिय कार्यालयाने केली होती. पहिल्या आठ दिवसात ४८७५ व्यक्ती आणि ११५ गणपती मंडळांना ही पावडर वाटण्यात आली. उर्वरीत पावडर विसर्जनाच्या शेवटच्या दिवशी वाटण्यात आली.

कोथरुडमध्ये गांधीभवन, शांतीबन चौक, जीत मैदान, स्वातंत्र्यवीर सावरकर मैदान, थोरात उद्यान, भारती विद्यापीठ कन्याशाळा, सुतारदरा हजेरी कोठी, लोढा पेट्रोल पंप, मयूर कॉलनी, तेजस नगर आदी भागात विसर्जन हौद तसेच सोसायटी व वस्ती विभागात फिरत्या हौदांची व्यवस्था करण्यात आली होती.