कल्याणीनगरमध्ये कार्यालय असलेल्या एका बड्या आयटी कंपनीने त्यांच्या ४०० कर्मचाऱ्यांचा पीएफ भरला नसल्याचे उघड झाले.
पुणे - परदेशातील प्रोजेक्ट कमी झाल्याने कॉस्ट कटींगच्या नावाखाली नोकरी जाण्याची भीती, परदेशात जाण्याच्या घटलेल्या संधी, मनाप्रमाणे न झालेली पगारवाढ या व अशा अनेक समस्यांचा सामना करीत असलेल्या अनेक आयटीयन्सला आता त्यांच्या भविष्य निर्वाह निधीसाठीही (ईपीएफ) लढा द्यावा लागत आहे. येथील काही कंपन्यांनी अनेक आयटीयन्सचे पीएफचे पैसे कर्मचाऱ्यांच्या खात्यातून वजा केले. मात्र, ती रक्कम व कंपनीचा हिस्सा पीएफ खात्यात भरलाच नसल्याचे प्रकार पुढे आले आहेत.
कल्याणीनगरमध्ये कार्यालय असलेल्या एका बड्या आयटी कंपनीने त्यांच्या ४०० कर्मचाऱ्यांचा पीएफ भरला नसल्याचे उघड झाले. त्यामुळे या कंपनीविरोधात तेथील आयटीयन्स आणि काही कामगार संघटनांनी कामगार विभागात दाद मागितली आहे. त्यानुसार विभागाने याबाबत संयुक्त बैठकही आयोजित केली आहे. विशेष म्हणजे भारतासह परदेशातील कंपन्यांनीही पीएफची रक्कम जमा केलेली नाही.
कर्मचाऱ्याच्या बाजूचे पीएफचे पैसे पीएफ खात्यात जमा करण्यात आले, मात्र कंपनीने त्यांचा हिस्सा जमा केला नाही. किंवा दोन्ही बाजूचा पीएफ कंपनीने जमा न केल्याचे अनेक प्रकार यापूर्वी उघडकीस आले आहेत. त्याच फटका अनेक कर्मचाऱ्यांना बसत आहे.
पीएफ न भरणाऱ्या कंपनीवर होतो गुन्हा दाखल
कंपनीने कर्मचाऱ्याचा पीएफ भरला नाही तर ईपीएफ आणि एमपी कायदा, १९५२ च्या कलम १४ अंतर्गत गुन्हा दाखल होऊ शकतो. १४ ए ए शिक्षा, १४ ए बी हा गुन्हा दखलपात्र आहे. तर १४ ए सी गुन्ह्यांची दखल आणि चाचणी करते.
अशी मागा दाद
पीएफ न देणाऱ्या कंपनीविरोधात कर्मचारी पीएफ कार्यालयात तक्रार करू शकतो
पीएफ आयुक्तांना दखल घेत योग्य ती कारवार्इ करावी लागते
पोलिसांत तक्रार दाखल करता येते
कंपनीने व्याजासह पीएफ देण्याची तरतूद
एझ्युया या कंपनीने कर्मचाऱ्यांच्या पगारातून टीडीएस कपात केला. मात्र, तो प्राप्तिकर विभागाकडे जमा केला नाही. तसेच कर्मचाऱ्यांच्या पगारातून कपात केलेला भविष्य निर्वाह निधीचा वापरही कंपनीने चुकीच्या पद्धतीने केला. कंपनीने काही कामगार कायद्यांचे उल्लंघन केले आहे. त्यामुळे आम्ही याबाबत प्राप्तिकर विभाग, कर्मचारी भविष्य निर्वाह निधी संघटना (इपीएफओ) आणि राज्याच्या कामगार आणि रोजगार मंत्रालयाकडे तक्रार केली आहे. त्यानुसार प्राप्तिकर विभागाने हे प्रकरण आयकर महासंचालक पुणे यांच्याकडे पाठवले आहे.
- हरप्रीत सलुजा, अध्यक्ष, नेसेन्ट इनफॉर्मेशन टेक्‍नॉलॉजी एम्प्लाईज सिनेट
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.