वडगाव : हातामध्ये कोयते, बिअरच्या बाटल्या घेऊन रस्त्यावर दहशत माजवीत सहा दुचाकीवरून आलेल्या दहा ते बारा गुंडांनी संगमवाडीकरांना रात्रभर दहशतीखाली ठेवले. अचानक घडलेल्या या प्रकारामुळे रात्रीचे जेवण करून बाहेर बसलेल्या महिला, वृद्ध आणि लहान मुले चांगलीच भेदरली. यावर कळस म्हणजे कोयता गॅंगची माहिती देण्यासाठी गेलेल्या नागरिकांचा या गुंडांनी पोलीस ठाण्यापर्यंत पाठलाग केला.
येरवड्यातील संगमवाडी येथे सोमवारी रात्री सव्वा दहा वाजण्याच्या दरम्यान सुरू झालेला हा थरार मंगळवारी पहाटे तीन वाजेपर्यंत सुरू होता. स्थानिक नागरिकांनी दिलेल्या माहितीनुसार, संगमवाडीतील दोन गटांमध्ये रस्त्यात का उभा राहिला, या किरकोळ कारणावरून बाचाबाची झाली होती. यात सहभागी पाच-सहा तरुणांच्या एका गटाने पुणे शहरातील काही गुंडांना बोलावून घेतले. सहा दुचाकी वरून आलेल्या या गुंडांनी हातात कोयते आणि बियरच्या बाटल्या फोडण्यासाठी घेतलेल्या होत्या.
हे सर्व गुंड संगमवाडीतील रस्त्यांवरून दुचाकीवरून फिरत होते. गाववाल्यांना दाखवतो अशी धमकी देत होते. त्यामुळे संगमवाडी येथील काही नागरिक याची तक्रार देण्यासाठी येरवडा पोलीस ठाण्यापर्यंत पोहोचले. त्यांचा पाठलाग या गुंडांनी येरवडा पोलीस ठाण्यापर्यंत केला. रात्री एक वाजता पोलीस ठाण्यातून घरी जाताना येरवडा ते सादवाल बाबा दर्गा जवळ या गुंडांनी पुन्हा नागरिकांचा पाठलाग सुरू केला. त्यामुळे भीतीपोटी नागरिक पर्णकुटी जवळ थांबले.
तेथे पोलीस आल्यानंतर नागरिकांना घरी नेऊन सोडण्यात आले. पोलिसांनी रात्री या गुंडांचा पाठलाग करण्याचा प्रयत्नही केला. हा थरार मंगळवारी पहाटे तीन वाजेपर्यंत सुरू होता.गुंडांनी संगमवाडीत दहशत माजवल्याचे सीसीटीव्ही फुटेजही नागरिकांनी पोलिसांना दाखवले. झालेल्या प्रकारावर कारवाई करण्याची मागणी करण्यासाठी संगमवाडी येथील अनेक प्रतिष्ठित गावकरी व तरुण हे मंगळवारी येरवडा पोलीस ठाण्यात जमले होते. त्यांनी वरिष्ठ पोलीस निरीक्षकांची भेट घेऊन घडलेला प्रकार सांगितला.
बाळकृष्ण कदम (वरिष्ठ पोलीस निरीक्षक, येरवडा)
संगमवाडी मध्ये रात्री कोयता हातात घेऊन दहशत माजवण्याचा प्रयत्न झाला, ही गोष्ट खरी आहे. परंतु यामध्ये बाहेरील गुंडांसोबत स्थानिक तरुणही सहभागी असल्याने अद्याप कोणीही तक्रार दिलेली नाही. दोन्ही गटांची बैठक घेऊन सामोपचाराने मार्ग काढण्याची विनंती गावकऱ्यांनी केली आहे. बैठक बोलावणार आहे. त्यानंतर गुन्हा दाखल केला जाईल. संगमवाडीतील अवैध धंदे बंद केले जातील. अवैध धंद्या विरोधात गावकऱ्यांनीही जागरूक राहून पोलिसांना सहकार्य करावे.
अवैध धंद्यांमुळे कायदा सुव्यवस्थेचा प्रश्न ?
स्थानिक नागरिकांनी दिलेल्या माहितीनुसार, कायद्याचा धाक नसल्याने संगमवाडी परिसरात मटका, सोरट जुगार आणि गांजा आणि रात्रभर चालणाऱ्या खाद्यपदार्थाच्या गाड्या यासारख्या अवैध गोष्टींमुळे तरुण वाम मार्गाला लागत आहेत. पोलिसांनी या भागात कायद्याचा धाक निर्माण करावा, अशी स्थानिक नागरिकांची मागणी आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
