Pune Loksabha Election : पुणे लोकसभा मतदारसंघाच्या पोटनिवडणुकीसाठी १२ हजार ६०० मशिन उपलब्ध

पुणे - पुणे लोकसभा मतदारसंघाच्या पोटनिवडणुकीबाबत उत्सुकता वाढू लागली आहे. केंद्रीय निवडणूक आयोगाने जाहीर केली नसली, तरी आयोगाकडून मात्र बॅलेट युनिट, कंट्रोल युनिट आणि व्हीव्हीपॅट अशा एकूण १२ हजार ६०० मशिन जिल्हा प्रशासनाकडे दिल्या आहेत. दरम्यान, जिल्हा प्रशासनाकडून या मशिनची प्राथमिक तपासणी सुरू केली आहे, अशी माहिती जिल्हाधिकारी कार्यालयाकडून दिली आहे.

पुणे लोकसभेचे खासदार गिरीश बापट यांचे निधन (ता. २९ मार्च २०२३ रोजी) झाले. बापट यांच्या निधनामुळे ही जागा रिक्त आहे. याबाबतची माहिती जिल्हा प्रशासनाकडून केंद्रीय निवडणूक आयोगाकडे पाठविली आहे. पुढील वर्षी म्हणजे एप्रिल २०२४ मध्ये लोकसभेच्या सार्वत्रिक निवडणुका होणार आहे. त्यामुळे अवघ्या काही महिन्यांसाठी पुणे लोकसभेसाठी पोटनिवडणूक होणार की नाही याबाबत चर्चा सुरू आहे.

केंद्रीय निवडणूक आयोगाने पोटनिवडणुकीचा कार्यक्रम जाहीर केला नसला तरी जिल्हा प्रशासनाकडून तयारी सुरू केली आहे. निवडणुकीसाठी महत्त्वाचे असलेले ईव्हीएम मशिन केंद्रीय निवडणूक आयोगाने जिल्हा प्रशासनाला दिल्या आहे. या मशिन नविन आहेत. यामध्ये बॅलेट युनिट चार हजार २००, कंट्रोल युनिट चार हजार २०० आणि व्हीव्हीपॅट चार हजार २०० अशा मशिन प्राप्त झाल्या आहे.

कोरेगाव पार्क येथील खाद्य गोदामामध्ये या मशिनची प्राथमिक तपासणी सुरू आहे. पुढील दोन दिवसात ही तपासणी पूर्ण होईल, असे प्रशासनाकडून सांगण्यात आले. प्राथमिक तपासणीमध्ये मशिन वापरण्यायोग्य आहे का, याची तपासणी केली जात आहे. त्यानंतर दुसऱ्या टप्प्यात मशिनची फस्ट लेव्हल तपासणी केली जाणार आहे. उपजिल्हाधिकारी, तहसीलदार यांच्या देखरेखीखाली तपासणी सुरु असून तलाठी, मंडल अधिकारी, महसुल विभागातील कारकून हे तपासणीचे काम करत असल्याचे जिल्हा प्रशासनाकडून सांगण्यात आले.

दरम्यान, पुणे लोकसभा विधानसभा मतदारसंघात वडगावशेरी, शिवाजीनगर, कोथरूड, पर्वती, पुणे कॅन्टोन्मेंट आणि कसबा या सहा विधानसभा मतदारसंघाचा समावेश होतो. पुणे लोकसभा मतदारांची एकूण मतदारसंख्या सुमारे १९ लाख ७२ हजार इतकी आहे. तर मतदानकेंद्रांची सुमारे दोन हजार इतकी आहे.