खड्डा भरल्यावर २ मिनिटात ट्रॅफिक सुरू, पालिकेचा नवा प्रयोग रिअँक्टिव्ह

मुंबई - रस्त्यावरील खड्डे आणि पावसाचे पाणी यांचे साप आणि मुंगुसासारखे नात आहे. गेल्या काही वर्षात सातत्याने खड्डे बुझवण्यासाठी नवनव्या तंत्रज्ञानाचा वापर करणाऱ्या मुंबई महानगरपालिकेने आणखी एका तंत्रज्ञानाचा वापर करण्याचे ठरलवे आहे. भर पावसातही रिअँक्टिव्ह अस्फाल्ट टेक्नोलॉजीचा वापर डांबरी रस्त्यावर करण्यात येणार आहे. या टेक्नॉलॉजीमुळे धो धो पाऊसांतही काही मिनिटांत खड्डा बुजवणे शक्य होणार आहे. याबाबतची निविदा प्रक्रिया सुरू झाल्याची माहिती पालिकेच्या रस्ते विभागाकडून देण्यात आली. महत्वाचे म्हणजे या पद्धतीने रस्ते बुझवण्यासाठी पालिका २ कोटी रूपये खर्च करणार आहे.

कोल्डमिक्स तंत्रज्ञानाने पावसाळ्यात खड्डे बुझवण्यासाठी येणाऱ्या मर्या पाहता पालिकेने यंदा खड्डे बुजवण्यासाठी जीओ पॉलिमर, एम ६००, पेव्हर ब्लॉक व रॅपिड हार्डिंग या चार तंत्रज्ञानाचा प्रयोग केला. आता रिअँक्टिव्ह टेक्नोलॉजीचा प्रयोग करण्याचा निर्णय घेतला आहे. हे तंत्रज्ञान धो धो पाऊस सुरु असताना आणि पावसाच्या विश्रांतीनंतर या टेक्नोलॉजीचा वापर करणे उपयुक्त ठरणार आहे. ज्या निविदाकाराचा प्रतिसाद मिळेल त्या कंपनीचा अनुभव लक्षात घेऊन कंत्राट दिले जाणार आहे. जोरदार पाऊस, खड्ड्यात पाणी भरले असताना रिअँक्टिव्ह टेक्नोलॉजीचा वापर करणे उपयुक्त ठरणार आहे. मात्र या नवीन टेक्नोलॉजीचा वापर फक्त डांबरी रस्त्यावर पडलेले खड्डे बुजवण्यासाठी होणार आहे.

रिअँक्टिव्ह अस्फाल्ट टेक्नोलॉजीत केमिकल व डांबराचा वापर करण्यात येणार आहे. विशेष म्हणजे या टेक्नोलॉजीमुळे वाहनांच्या टायरला रिअँक्टिव्ह अस्फाल्ट चिकटणार नाही. तसेच खड्डा बुजवल्यानंतर पुढील दोन मिनिटांत वाहने धावू शकणार आहेत. पाण्याच्या संपर्कात आल्यानंतरही खड्ड्यासाठी वापरण्यात आलेल्या अस्फाल्टवर कोणताही परिणाम होत नसल्याचे या तंत्रज्ञानाच्या वापरातून आढळले आहे.