Pune News: शहरात रात्री मद्यपींची वाहने सुसाट, पोलिस कारवाई करणार?

Pune News: शहरात रात्री मद्य सेवन करून प्रमुख रस्त्यांवर वाहने भरधाव चालविण्याच्या घटना सर्रास दिसून येत आहेत. अशा मद्यपी वाहनचालकांमुळे पादचारी आणि इतर वाहनचालकांच्या जिवाला धोका निर्माण झाला आहे. पोलिसांनी अशा मद्यपी वाहनचालकांवर कठोर कारवाई करावी, अशी मागणी केली जात आहे.

शहरात रात्री मद्य सेवन करून वाहने चालविणाऱ्यांची संख्या वाढली आहे. तसेच, बेशिस्त वाहनचालकांचे प्रमाण वाढले आहे. परंतु त्यांच्यावर कारवाई करण्यासाठी रात्री रस्त्यावर वाहतूक पोलिस नसतात.

रात्रीच्या गस्तीवरील पोलिसांकडूनही अशा भरधाव वाहनचालकांवर कारवाई केली जात नाही. रात्री मद्यपींच्या सुसाट धावणाऱ्या वाहनांमुळे अपघात होत आहेत. वाहतूक पोलिसांनी ‘ड्रंक ॲन्ड ड्राइव्ह’ अंतर्गत कारवाई वाढविण्याची गरज आहे.

साडेचार महिन्यांत ४७९ मद्यपी वाहनचालकांवर कारवाई -

शहरात मद्य सेवन करून गाडी चालविणाऱ्या एक हजार ७८ वाहनचालकांवर वाहतूक पोलिसांकडून ‘ड्रंक ॲण्ड ड्राईव्ह अंतर्गत कारवाई करण्यात आली आहे. मागील अडीच वर्षांतील ही कारवाई असून, गेल्या साडेचार महिन्यांत ४७९ वाहनचालकांवर कारवाई करण्यात आली आहे.

वर्ष- ड्रंक ॲण्ड ड्राईव्ह कारवाई

२०२२- ३७

२०२३- ५६२

१९ मे २०२४ अखेर- ४७९

अल्पवयीन वाहनचालकांवर कारवाई

शहरात विनापरवाना वाहन चालविणाऱ्यांमध्ये अल्पवयीन मुलांचे प्रमाणही वाढले आहे. वाहतूक पोलिसांकडून २०२३ मध्ये विनापरवाना वाहन चालविणाऱ्या १६ वर्षांखालील ४८ अल्पवयीन मुलांवर कारवाई करण्यात आली. तर, २०२४ मध्ये १९ मेअखेर २६ अल्पवयीन वाहनचालकांवर कारवाई करण्यात आली आहे.