Pune News : दबक्या पावलांनी आला अन् बस घेऊन गेला; पुण्यात चोरट्याने PMP बस चोरली

पुणे : सारसबाग परिसरात सणस मैदानाजवळ पार्क केलेली पीएमपी बस चक्क चोरीस गेल्याची घटना घडली. पोलिसांनी शोध घेतला असता ही बस मार्केट यार्ड परिसरात आढळली. परंतु चोरट्याने जाताना बसमधील बॅटरी चोरून नेल्याचे समोर आले.

या प्रकरणी पीएमपीच्या स्वारगेट आगारातील सुरक्षा अधिकारी सुरेश सोनवणे यांनी फिर्याद दिली आहे. त्यावरून स्वारगेट पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, पीएमपीच्या स्वारगेट आगारातून धावणाऱ्या बसेस रात्री लष्कर भागातील पूलगेट स्थानकात लावण्यात येतात.

पालखी सोहळ्यामुळे पूलगेट स्थानकात बस लावण्यास जागा नसल्याने चालकाने सारसबाग परिसरातील सणस मैदानाजवळ बस लावली होती. परंतु बसलाच चावी असल्याचे पाहून चोरट्याने मध्यरात्री बस पळवून नेली. बस चोरीस गेल्याचे बुधवारी (ता. १४) लक्षात आल्यानंतर पीएमपीच्या अधिकाऱ्यांनी पोलिस ठाण्यात तक्रार दिली.

त्यानंतर पोलिसांनी शोध घेतला असता ही बस मार्केट यार्ड परिसरात सापडली. परंतु चोरट्याने जाता जाता बसमधील पाच हजार रुपये किमतीची बॅटरी चोरून नेली. तसेच, बसच्या काचाही फोडल्या. याबाबत पीएमपी सुरक्षा अधिकाऱ्याने तक्रार दिल्यानंतर स्वारगेट पोलिसांनी अज्ञात चोरट्याविरुद्ध गुन्हा दाखल केला आहे. बस चोरीच्या या घटनेमुळे पीएमपी बसेसच्या सुरक्षिततेबाबत प्रश्नचिन्ह निर्माण झाले आहे.