सर्व क्षेत्रात महिलांचा ५० टक्के सहभाग आवश्यक : नीलम गोऱ्हे

पुणे : महिला सक्षमीकरण हे ध्येय आहे आणि सुरक्षितता हा त्यावरून जाण्याचा मार्ग असून, सर्व क्षेत्रात महिलांचा ५० टक्के सहभाग असणे आवश्यक असल्याचे प्रतिपादन विधान परिषदेच्या उपसभापती डॉ. नीलम गोऱ्हे यांनी केले.

स्त्री आधार केंद्रातर्फे जागतिक महिला हिंसाचार विरोधी दिनानिमित्त २५ नोव्हेंबर ते १० डिसेंबर या कालावधीत ‘महिला सक्षमीकरण व महिलांची सुरक्षितता’ या विषयावर चर्चासत्रांचे आयोजन करण्यात आले आहे. यानिमित्त शनिवारी (ता. ४) महिलांची सुरक्षितता व महिला सक्षमीकरण अंतर्गत महिलांचे समुपदेशन’ या विषयावर चर्चासत्रात डॉ. गोऱ्हे बोलत होत्या.

डॉ. गोऱ्हे म्हणाल्या, येत्या २०३० पर्यंत सर्व क्षेत्रात ५० टक्के महिला असाव्यात, यादृष्टीने सर्व महिलांनी प्रयत्न करणे गरजेचे आहे. सर्व घटनांमध्ये तीन महत्त्वाचे मुद्दे लक्षात घेऊन त्यामध्ये बदल होणे आवश्यक आहे. त्यापैकी पहिला मुद्दा म्हणजे आपण स्त्रीचे म्हणणे ऐकायला शिकले पाहिजे. दुसरा मुद्दा म्हणजे स्त्रिया जेव्हा अन्यायाबाबत सांगतात तेव्हा कोणत्या कायद्यातून आधार मिळू शकतो, याबाबत उपाययोजनांची माहिती देणे गरजेचे आहे. तिसरा महत्त्वाचा मुद्दा म्हणजे स्त्रियांवरील अत्याचार रोखण्यासाठी आपण काय करू शकतो, याबाबत विचार करणे आवश्यक आहे.

या चर्चासत्रात स्त्री आधार केंद्राच्या अपर्णा पाठक यांनी केशरी दिवस संस्कृती व कार्यपद्धती याबाबत माहिती दिली. सहायक पोलिस आयुक्त रुक्मिणी गलांडे यांनी स्त्री अत्याचाराच्या घटनांमध्ये पोलिसांची भूमिका आणि महिलांचे हक्क याबाबत माहिती दिली. वैशाली वढे, अनिता परदेशी, अंजली कुलकर्णी यांनी अनुभव कथन केले. तर, विभावरी कांबळे यांनी आभार मानले.