Pune Accident: ...म्हणून मी माझ्या मुलाची शाळा बदलली; आरोपी तरुणाबाबत प्राजक्त तनपुरेंच्या पत्नीचा धक्कादायक खुलासा

पुणे- पुण्यातील कल्याणीनगरमध्ये बिल्डरचा अल्पवयीन मुलगा दोन जीवांच्या मृत्यूला कारणीभूत ठरला आहे. त्यामुळे लोकांमध्ये संतापाची लाट आहे. याच पार्श्वभूमीवर राष्ट्रवादी शरद पवार गटाचे नेते प्राजक्त तनपुरे यांच्या पत्नी सोनाली तनपुरे यांनी आरोपी अल्पवयीन मुलाबाबत मोठा खुलासा केला आहे. त्या मुलामुळेच मला माझ्या मुलाला शाळेतून काढावं लागलं असं त्या म्हणाल्या आहेत.

सोनाली तनपुरे यांनी एक्सवर ट्वीट करत म्हटलंय की, कल्याणीनगर येथील कार ॲक्सीडेंट नंतर पुन्हा एकदा त्या गोष्टी आठवल्या.संबंधित घटनेतील मुलगा हा माझ्या मुलासोबत एकाच वर्गात शिकत होता. त्यावेळी त्यापैकी काही मुलांकडून माझ्या मुलाला खूप त्रास झाला होता. या मुलांची तक्रार मी त्यांच्या पालकांकडे केली होती.

मात्र योग्य तो प्रतिसाद मिळाला नाही. शेवटी या मुलांच्या त्रासाला कंटाळून त्याची शाळा बदलावी लागली. त्या घटनांचा वाईट परिणाम आजही त्याच्या मनावर आहे. वाईट प्रवृत्ती असणाऱ्या मुलांची दखल वेळीच घेतली गेली असती तर असा भयंकर गुन्हा कदाचित घडला नसता, असं त्या म्हणाल्या आहेत.

त्यादिवशी झालेल्या अपघातात सुशिक्षित तरुण तरुणीचा निष्पाप बळी गेला. त्यांची कुटुंबे उद्ध्वस्त झाली. या कुटुंबांना न्याय मिळायला हवा, अशी मागणी सोनाली तनपुरे यांनी केली आहे.

आरोपी तरुणाने मद्यपान करुन पोर्शे कार चालवली होती. कार नियंत्रणाबाहेर गेल्याने त्याने टू-व्हीलरला धडक दिली. यात दोघांचा मृत्यू झाला होता. आरोपीने घटनास्थळावरुन पळून जाण्याचा प्रयत्न केला. तेव्हा जमावाने पकडून त्याला मारहाण केली. पोलिसांनी त्याला ताब्यात घेतले. पण, १२ तासांत त्याची जामीनावर सुटका झाली आहे. या घटनेवरुन पुण्यासह राज्यातील लोकांमध्ये संतापाची भावना निर्माण झाली आहे.

मिळाल्या माहितीनुसार, आरोपी तरुण हा १७ वर्षाचा आहे. त्यामुळे साहजिक त्याच्याकडे वाहन चालवण्याचा परवाना नव्हता. तरी त्याला पोर्शे अलिशान कार चालवण्याची परवानगी त्याच्या बिल्डर वडिलांनी दिली. तसेच तो मद्यपान करत असल्याची माहिती वडिलांना होती. पोर्शे कारची नोंदणी झालेली नव्हती, तसेच त्याला नंबर प्लेट सुद्धा नव्हती. पोलिसांनी आरोपीला पकडल्यानंतर त्याला विशेष वागणूक दिल्याचा देखील आरोप आहे.