Pune Rain: परतीच्या पावसानं पुण्यात दाणादाण! वाघोलीत धुंवाधार, पेठांमध्ये वाहनचालकांची कसरत

पुणे : परतीच्या पावसानं पुण्यात अक्षरशः दाणादाण उडाली आहे. शहरातील मुख्य भाग असलेल्या पेठांमध्ये मोठ्या प्रमाणावर पाणी साचल्यानं वाहनचालकांना कसरत करत मार्ग काढावा लागत आहे. तर पुणे शिवाजीनगर, पुणे विद्यापीठ चौक, बाणेर रोड या परिसरात सकाळपासूनच वाहतूक कोंडीचा सामना वाहन चालकांना करावा लागत आहे.

सकाळपासूनच पुणे शहर, उपनगर आणि ग्रामीण भागात पाऊस सुरुच होता. त्यामुळं सकाळपासूनच वातावरण ढगाळलेलं होतं. शहर अंधारुन आल्यासारखं झालं आहे. सकाळपासून सूर्याचं देखील दर्शन झालेलं नाही. पण गेल्या तासाभरापासून शहर आणि उपनगरांमध्ये मोठ्या प्रमाणावर पाऊस सुरु आहे. त्यामुळं शहरातील विविध सखल भागांमध्ये पाणी साचलं आहे. तसंच शहरात मेट्रोची कामं सुरु असल्यानं मोठ्या प्रमाणावर ट्राफिक देखील जाम झाल्याचं पहायला मिळालं. Pune Rain latest update

दरम्यान, दोन दिवसांपूर्वीच हवामान खात्यानं पुणे शहरासह महाराष्ट्रात चार दिवस मुसळधार पावसाचा अंदाज वर्तवला होता. हा अंदाज तंतोतंत खरा ठरला असून पुणे शहराला पावसानं चांगलंच झोडपून काढलं आहे. हा परतीचा पाऊस असल्याचंही हवामान विभागानं स्पष्ट केलं आहे. पावसाचा जोर कायम असल्यानं नागरिकांना सतर्कतेचा इशाराही देण्यात आला आहे.