पुण्यात शिवसेनेला पुन्हा उभे करणार - गजानन कीर्तिकर

कोथरूड - शिवसेनेला मानणारा मोठा वर्ग पुण्यात आहे. मला पुन्हा पुणे उभे करायचे आहे अशा शब्दात बाळासाहेबांची शिवसेना गटाचे नेते व खासदार गजानन कीर्तिकर यांनी पुण्यातील संघटन बांधणीवर लक्ष केंद्रीत करणार असल्याचे सुचित केले. मुख्यमंत्री एकनाथ शिंदे यांच्या गटात प्रवेश केल्यानंतर कीर्तिकर यांनी प्रथमच कोथरूड मध्ये पत्रकारांशी संवाद साधला. बाळासाहेबांची शिवसेना गटाच्या युवा सेनेच्या वतीने कीर्तिकर यांचे स्वागत आणि सत्कार करण्यात आला. यावेळी कीर्तिकर यांनी माध्यमांशी संवाद साधला. बाळासाहेबांची शिवसेना पक्षाचे शहर प्रमुख प्रमोद भानगिरे, महाराष्ट्र राज्य युवा सेना सचिव किरण साळी, अजय बापू भोसले व शहराचे उपप्रमुख व युवा सेना पदाधिकारी यावेळी उपस्थित होते.

स्वतःच्या हिमतीने जे कार्यकर्ते शिंदे गटात आले आहेत त्यांनी मला सांगितले की, तुम्ही आलात आम्हाला बळ मिळाले. पुण्यात शिवसेनेचा अवशेष राहीला नाही हा गैरसमज आहे. असे सांगत कीर्तिकर यांनी पुणे जिल्ह्यात संघटन बांधनीत लक्ष देणार असल्याचे सांगितले.

शिवसेनेचा काँग्रेस व राष्ट्रवादी काँग्रेस सोबतचा प्रवास घातक असल्याने मुख्यमंत्री एकनाथ शिंदे सोबत जाण्याचा निर्णय घेतल्याचा पुनर्ऊच्चार करत कीर्तिकर म्हणाले की, बाळासाहेबांच्या नेतृत्वात काम करताना आम्ही संघटनेला वाहून घेतले. बाळासाहेबांनी देखील कार्यकर्त्यांची क्षमता ओळखत प्रत्येकाला योग्य वेळी संधी दिली.

कीर्तिकर पत्रकारावर भडकले

तुम्ही निष्ठावंत आहात का? या पत्रकाराने विचारलेल्या प्रश्नावर भडकलेल्या कीर्तिकरांनी, तु पत्रकारितेचे शिक्षण घेतले आहेस का? असा प्रतिप्रश्न केला? पत्रकार परिषदेत पत्रकारांनी सोयीचे प्रश्न विचारावेत असे गृहीत राजकारणी धरू लागलेत. त्यामुळे पत्रकारांनी एखादा बोचरा प्रश्न विचारताच राजकीय नेते आगपाखड करताना दिसत आहेत.

• संजय राऊत यांना वाढदिवसानिमित्त तीन तीन वेळा फोन केले पण त्यांनी फोनच उचलला नाही. अखेर त्यांना मेसेज केला.

• संजय राऊतांवर असलेला आरोप फार किरकोळ आहे.

• आमच्या पक्षाचे काय होईल असे सांगणा-या संजय राऊत, विनायक राऊत यांचे पुढील निवडणूकीत काय होईल ते त्यांना विचारा.

• संजय निरूपमने सांगितले म्हणून मी राजीनामा देणार नाही. माझ्याविरुद्ध उभे रहायला सांगा पावणेतीन नव्हे पावणेचार लाखाच्या फरकाने मी विजयी होईल.

• प्रियंका चतुर्वेदी यांना खासदारकी देणे संघटनेच्या विरोधात होती.

• जे आमदार माझ्यामुळे शिंदे मुख्यमंत्री झाले आहेत त्यांनाही मी शिस्त लावणार आहे.