Pune Accident : फोनवर बोलताना दुचाकी आदळली दुभाजकावर; डोक्याला मार लागल्याने तरुणाचा मृत्यू

किरकटवाडी : दुचाकी चालवताना फोनवर बोलणे एका एकोणीस वर्षीय तरुणाच्या जीवावर बेतले असून गाडी दुभाजकावर आदळून डोक्याला मार लागल्याने तरुणाचा मृत्यू झाला आहे. प्रथमेश सुरेश ननावरे (वय 19, रा. बेनकर वस्ती, धायरी) असे अपघातात मृत्यू झालेल्या तरुणाचे नाव आहे.

सिंहगड रस्त्यावरील नांदेड फाटा ते किरकटवाडी फाटा या दरम्यान असलेल्या राष्ट्रीय जल अकादमी (एन डब्ल्यू ए) जवळ सायंकाळी सात वाजण्याच्या सुमारास ही‌ धक्कादायक घटना घडली आहे. प्रथमेश ननावरे हा तरुण किरकटवाडी येथील त्याच्या नातेवाईकांकडे आला होता. सायंकाळी सात वाजण्याच्या सुमारास तो परत जात असताना राष्ट्रीय जल अकादमीजवळ त्याला फोन आला असता त्याने फोन उचलून बोलणे सुरू केले.

पाऊस सुरू असल्याने व रस्त्यावर पथदिवे नसल्याने फोनवर बोलण्याच्या नादात दुचाकी दुभाजकावर आदळली व प्रथमेश जोरात रस्त्यावर पडला. त्याच्या डोक्याला गंभीर मार लागल्याने तो जागीच बेशुद्धावस्थेत पडला होता.

अपघाताची माहिती मिळताच हवेली पोलीस ठाण्याचे पोलीस निरीक्षक सचिन वांगडे यांच्या मार्गदर्शनाखाली वाहतूक पोलीस हवालदार सचिन कदम, प्रविण ताकवणे व मकसुद सय्यद हे तातडीने घटनास्थळी दाखल झाले होते. प्रथमेशला उपचारांसाठी किरकटवाडी फाट्याजवळील खासगी रुग्णालयात दाखल करण्यात आले होते मात्र डोक्याला गंभीर दुखापत झाल्याने त्याचा मृत्यू झाला आहे. हवेली पोलीस पुढील कार्यवाही करत आहेत.