पुणे : पीएमपीमध्ये चोरी करणाऱ्यास अंमली पदार्थ विरोधी पथकाकडुन अटक

पुणे : पीएमपी बसमध्ये प्रवाशांचे मोबाईल व अन्य मौल्यावन वस्तु चोरणाऱ्या एका चोरटयास अंमली पदार्थ विरोधी पथकाने बेड्या ठोकल्या. पोलिसांनी अटक केलेला चोरटा हा कर्नाटकातून कारने पुण्यात येत शहराच्या वेगवेगळ्या भागात चोरी करणाऱ्या टोळीतील सदस्य आहे. पोलिसांनी त्याच्याकडुन चोरीचे ३८ मोबाईल व एक कार असा १५ लाख रूपयांचा मुद्देमाल जप्त केला.

नागेश आप्पाना (वय २५, रा. आंध्र प्रदेश) असे अटक केलेल्या आरोपीचे नाव आहे. शहराच्या वेगवेगळ्या भागात मागील काही महिन्यापासून मोबाईल चोरीच्या घटना मोठ्या प्रमाणात वाढल्या आहेत. या पार्श्वभूमीवर पोलिसांकडून आरोपीचा शोध घेतला जात होता.

अंमली पदार्थ विरोधी पथकाचे पोलिस निरीक्षक विनायक गायकवाड व सहायक पोलिस निरीक्षक लक्ष्मण ढेंगळे हे त्यांच्या पथकासह गस्त घालत होते. त्यावेळी स्वारगेट येथील पीएमपी बस स्थानकाजवळ कर्नाटक राज्याची नंबर प्लेट असलेली एक कार संशयास्पदरित्या उभी असलेली दिसली. तसेच कारजवळची व्यक्ति पोलिसांना पाहून दूसरीकडे गेली. पोलिसांना संशय आल्याने त्यांनी त्यास ताब्यात घेतले. मात्र त्यास केवळ तेलगु भाषा येत असल्याने पोलिसांनी दुभाषकामार्फत त्याची चौकशी केली. तसेच त्याच्याकडील कारची तपासणी केली, तेव्हा पोलिसांना कारमधील एका पिशवीत ३८ मोबाईल आढळून आले. सर्व मोबाईल हे चोरीचे असून ते त्याच्या साथीदारांमार्फत पीएमपीतील गर्दीचा फायदा घेऊन चोरल्याचे सांगितले.

आरोपींचे साथीदारा असून ते टोळीने मोबाईल चोरीचे गुन्हे करीत असल्याचे चौकशीत पुढे आले. त्याच्याकडे सापडलेले बहुतांश मोबाईल हे महागडे असून त्यापैकी १५ मोबाईलचे मालक भेटले आहेत.पोलिसांनी आरोपीला भारती विद्यापीठ पोलिस ठाण्याच्य हद्दीतील मोबाईल चोरीच्या गुन्ह्यात अटक करून त्याचा तपास गुन्हे शाखा युनिट दोनकडे देण्यात आला आहे.