पुणे - सावित्रीबाई फुले पुणे विद्यापीठासमोरील आनंदऋषिजी महाराज चौक परिसरात सोमवारी सायंकाळी मोठ्या प्रमाणावर वाहतूक कोंडी झाली. सेनापती बापट रस्ता जंक्शनजवळ रात्री दहा वाजेपर्यंत कोंडी होती. त्यामुळे वाहनचालकांना मन:स्ताप सहन करावा लागला.
सावित्रीबाई फुले पुणे विद्यापीठासमोरील चौकात मेट्रो आणि उड्डाणपुलाचे काम सुरू आहे. या कामांमुळे गणेश खिंड रस्त्यावरील वाहतूक संथ गतीने सुरू असते. या रस्त्यावर सकाळी ९ ते दुपारी १२ वाजेपर्यंत आणि सायंकाळी सहा ते रात्री नऊ वाजेपर्यंत वाहनांची संख्या अधिक असते.
या वेळी दररोज होणाऱ्या वाहतूक कोंडीमुळे शिवाजीनगर ते बाणेर, औंध आणि पाषाणकडे ये-जा करणाऱ्या वाहनचालकांना मानसिक त्रास सहन करावा लागत आहे. या रस्त्यावरील मेट्रो आणि उड्डाणपुलाचे काम पूर्ण होईपर्यंत वाहनांसाठी पर्यायी मार्ग आणि रस्ता रुंदीकरणाची कामे गतीने पूर्ण करण्यात यावीत, अशी मागणी नागरिकांकडून करण्यात येत आहे.
विद्यापीठासमोरील चौकात सध्या मेट्रोचे तीन पिलर टाकण्याचे काम सुरू आहे. पाणीपुरवठा विभागाकडून जुनी पाइपलाइन बदलण्याचे काम करण्यात येत आहे. तसेच खडकी रेल्वे स्थानकाच्या मागे रस्ता रुंदीकरणाचे काम सुरू आहे. या कामांमुळे विद्यापीठ चौकातील वाहतुकीवर परिणाम होत आहे.
दरम्यान, सेनापती बापट रस्ता जंक्शनपासून औंध आणि बाणेर-पाषाणकडे जाण्यासाठी स्वतंत्र लेन सुरू करण्यात येणार आहे. वाहतूक कोंडी दूर करण्यासाठी गुरुवारपर्यंत आवश्यक उपाययोजना करण्यात येणार असल्याचे वाहतूक पोलिसांकडून सांगण्यात आले.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.