पुणे - सावित्रीबाई फुले पुणे विद्यापीठाच्या सर्व विद्याशाखांमधील सर्व अभ्यासक्रमांच्या प्रथम वर्ष ते अंतिम वर्षातील विद्यार्थ्यांच्या हिवाळी सत्रातील परीक्षा २२ ऑक्टोबरपासून पारंपारिक पद्धतीने सुरू होणार आहेत. शैक्षणिक वर्ष २०२४-२५ मधील पदविका, पदवी आणि पदव्युत्तर अभ्यासक्रमाच्या नियमित व अनुशेषित विद्यार्थ्यांच्या लेखी आणि प्रात्यक्षिक परीक्षांचे आयोजन टप्प्या-टप्प्याने करण्यात आले आहे.
विद्यापीठाच्या अधिकार मंडळांनी घेतलेल्या निर्णयानुसार हिवाळी सत्राच्या (ऑक्टोबर-नोव्हेंबर) परीक्षांचे आयोजन करण्यात आले आहे. संबंधित परीक्षांची वेळापत्रके विद्यापीठाच्या ‘www.unipune.ac.in’ या संकेतस्थळावर टप्प्याटप्प्याने प्रसिद्ध करण्यात येणार आहेत. त्यामुळे विद्यार्थ्यांनी वेळोवेळी संकेतस्थळावरून माहिती घ्यावी, अशी सूचना विद्यापीठ प्रशासनाने केली आहे.
सर्व विद्याशाखेतील पदविका अभ्यासक्रम, पारंपारिक अभ्यासक्रमातील प्रथम वर्ष पदवी (कला, वाणिज्य व विज्ञान), विधी अभ्यासक्रमामधील प्रथम वर्ष पदवी (एलएलबी/बीएएलएलबी) या परीक्षांचे आयोजन महाविद्यालय स्तरावर करण्यात यावे.
या परीक्षांचे वेळापत्रक आणि प्रश्नपत्रिका तयार करणे, प्रत्यक्ष परीक्षांचे आयोजन करणे, उत्तरपत्रिका तपासणे, विद्यापीठाने उपलब्ध करून दिलेल्या संरक्षित अंतर्गत प्रणालीमध्ये गुण भरणे, ही सर्व कामे महाविद्यालय स्तरावर करण्यात यावीत, असे विद्यापीठाच्या परीक्षा व मूल्यमापन मंडळाचे संचालक डॉ. महेश काकडे यांनी परिपत्रकाद्वारे स्पष्ट केले आहे.
पारंपारिक अभ्यासक्रमातील कला, वाणिज्य आणि विज्ञान प्रथम वर्ष पदवी अभ्यासक्रम वगळून, तसेच पदव्युत्तर अभ्यासक्रमांची सर्व वर्ष, व्यावसायिक पदवी आणि पदव्युत्तर अभ्यासक्रमांच्या सर्व वर्षांच्या परीक्षांचे आयोजन विद्यापीठ स्तरावरून करण्यात येईल.
तसेच हिवाळी सत्रातील जुन्या नियमित आणि बहि:स्थ अभ्यासक्रमांच्या परीक्षा या समकक्ष विषयानुसार आयोजित केल्या आहेत. विद्यार्थ्यांनी विद्यापीठाच्या संकेतस्थळावर अभ्यासक्रमांतर्गत जाहीर केलेले समकक्ष विषयांची समग्र माहिती घेऊन त्याप्रमाणे परीक्षा द्यावी, असे डॉ. काकडे यांनी परिपत्रकाद्वारे नमूद केले आहे.
हिवाळी सत्राच्या परीक्षांचे वेळापत्रक -
अभ्यासक्रम : प्रात्यक्षिक परीक्षा : लेखी परीक्षा
- पदविका : १५ ते ३० ऑक्टोबर : १५ ऑक्टोबरनंतर
- प्रथम वर्ष बी.ए/बी.कॉम/बी.एस्सी (अभ्यासक्रम-२०१९) : १५ ते ३० ऑक्टोबर : १५ ऑक्टोबरनंतर
- प्रथम वर्ष बी.ए/बी.कॉम/बी.एस्सी (अभ्यासक्रम-२०२४) : २० ते ३० नोव्हेंबर : १ डिसेंबरनंतर
- द्वितीय आणि तृतीय वर्ष बी.ए/बी.कॉम/बी.एस्सी (अभ्यासक्रम-२०१९) : १५ ते ३० ऑक्टोबर : १२ नोव्हेंबरनंतर
- एम.ए/एम.कॉम/एम.एस्सी (अभ्यासक्रम २०१९/२०२३) : १२ ते २० नोव्हेंबर : २२ नोव्हेंबरनंतर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.