पुणे विद्यापीठाने शुल्कवाढ मागे घ्यावी - डॉ. बाबा आढाव

पुणे - स्वातंत्र्याच्या वेळी आम्हाला मोफत शिक्षणाचे आश्वासन दिले होते. सावित्रीबाई फुले पुणे विद्यापीठ शिक्षणाचे माहेरघर आहे. विद्यापीठातील शुल्कवाढ हा अन्याय आहेच, ती मागे घेतलीच पाहिजे, असे मत ज्येष्ठ सामाजिक कार्यकर्ते डॉ. बाबा आढाव यांनी व्यक्त केले.

विद्यापीठ येथील संविधान स्तंभ येथे भरमसाठ शुल्कवाढीविराधात बैठक आयोजित करण्यात आली होती. ११ ऑक्टोबर रोजी विद्यापीठ विद्यार्थी संघर्ष कृती समितीच्या वतीने आंदोलन करण्यात येणार आहे. यावेळी कायदेतज्ज्ञ ॲड. असीम सरोदे, ॲड. भाऊसाहेब आजबे, राहुल डंबाळे, सचिन पांडुळे, नवनाथ मोरे, निश्चय साक्षात साधना, प्रा. सुरेश देवढे, ओंकार मोरे आदींनी शुल्कवाढी विरोधात मत व्यक्त केले.

ॲड सरोदे म्हणाले, ‘विद्यापीठ हे कमाई करण्याचे साधन नाही. शिक्षण ही वस्तू नाही, त्यामुळे त्याचे बाजारीकरण करण्याचा निषेध केला पाहिजे. शुल्कवाढ करणे हे षडयंत्र असेल तर ते लढले पाहिजे. सर्वसामान्य विद्यार्थ्यांना शिकताच येणार नाही अशी व्यवस्था केली आहे. विद्यापीठाच्या बाबतीत सुद्धा शुल्क निर्धारण समिती असली पाहिजे. शुल्कवाढ चुकीची नसेल तर विद्यापीठाने स्पष्ट करावे.’ अक्षय निर्मळ याने सूत्रसंचालन तर वैष्णवी पाटील हिने आभार मानले. ओम बोदले आणि पौर्णिमा गायकवाड यांनी प्रास्ताविक केले.