पुणे : ग्रामीण भागातील शाळांची घंटा सोमवारपासून वाजणार

पुणे : पुणे जिल्ह्याच्या ग्रामीण भागातील इयत्ता पहिली ते चौथीच्या शाळांची घंटा येत्या सोमवारपासून (ता.६) वाजणार आहे. कोरोनाच्या प्रादुर्भावामुळे तब्बल २१ महिन्यांहुन अधिक काळ बंद असलेल्या ग्रामीण भागातील शाळा येत्या सोमवारपासून सुरू करण्याला पुणे जिल्हा प्रशासनाने मान्यता दिली आहे.

कोरोनाच्या संसर्गामुळे राज्यात मार्च २०२० पासून शाळा बंद करण्यात आल्या, दरम्यान ऑनलाइन शिक्षण सुरू ठेवण्यात आले. आता कोरोनाचा प्रादुर्भाव आटोक्यात आल्याने राज्य सरकारने शाळा टप्प्या-टप्प्याने सुरू करण्याचा निर्णय घेतला आहे. त्यानुसार शहरी भागातील इयत्ता आठवी ते बारावीचे आणि ग्रामीण भागातील इयत्ता पाचवी ते बारावीचे वर्ग ऑक्टोबरच्या सुरवातीपासून सुरू करण्यात आले.

दरम्यान राज्य सरकारने शहरी भागातील इयत्ता पहिली ते सातवीचे आणि ग्रामीण भागातील इयत्ता पहिली ते चौथीचे वर्ग स्थानिक परिस्थिती विचारात घेऊन एक डिसेंबरपासून सुरू करण्याचे आदेश दिले आहेत. या शाळा सुरू करण्याची जबाबदारी राज्य सरकारने स्थानिक प्रशासनाकडे सोपविली आहे. परंतु जगभरात कोरोनाचा ओमिक्रॉन हा नवा व्हेरियंट आढळला आहे. त्यामुळे प्रामुख्याने राज्यातील बहुसंख्य जिल्ह्यातील शाळांनी एक डिसेंबरपासून वर्ग सुरू न करण्याचा निर्णय त्या-त्या स्थानिक प्रशासनाने घेतला आहे. पुणे महापालिकेने शहरी भागातील इयत्ता पहिली ते सातवीचे वर्ग सुरू करण्याला १५ डिसेंबरपर्यंत स्थगिती दिली असून कोरोनाच्या परिस्थितीचा आढावा घेऊन याबाबत पुढील आदेश देण्यात येईल, असे महापालिकेने जाहीर केले आहे.

दरम्यान, जिल्हा प्रशासनाने ग्रामीण भागातील इयत्ता पहिली ते चौथीच्या शाळा सुरू करण्याला मान्यता दिली आहे. कोरोनाच्या सर्व मार्गदर्शक सूचनांचे पालन करूनच शाळा सुरू करण्याची कार्यवाही करावी, असे आदेश जिल्हाधिकारी डॉ. राजेश देशमुख, जिल्हा परिषदेचे मुख्य कार्यकारी अधिकारी आयुष प्रसाद, प्राथमिक शिक्षणाधिकारी अनिल गुंजाळ यांनी गटशिक्षणाधिकाऱ्यांना दिले आहेत.