Rahul Gandhi: सावरकरांवर बोलण राहूल गांधींना भोवणार? चार ऑक्टोबरला मांडावे लागणार म्हणणे

Latest Pune News: स्वातंत्र्यवीर सावरकर यांच्याविषयी वादग्रस्त वक्तव्य केल्याप्रकरणी काँग्रेस नेते राहुल गांधी यांना येथील प्रथमवर्ग न्यायदंडाधिकाऱ्यांनी सोमवारी (ता.१९) न्यायालयात हजर राहून आपले म्हणणे मांडण्याचा आदेश दिला होता. मात्र या प्रकरणावर सोमवारी सुनावणी झाली नाही. त्यामुळे पुढील सुनावणी चार ऑक्टोबरला होणार आहे.

न्यायदंडाधिकारी अक्षी जैन यांच्या न्यायालयात या प्रकरणाची सुनावणी सुरू आहे. राहुल गांधी यांनी आक्षेपार्ह वक्तव्याबाबत सावरकर यांचे नातू सात्यकी सावरकर यांनी केलेल्या तक्रारीत आढळलेले तथ्य आणि विश्रामबाग पोलिसांचा तपासणी अहवाल प्रथमदर्शनी ग्राह्य धरीत न्यायालयाने हा आदेश ३० मे ला दिला होता.

या प्रकरणात राहुल गांधी यांना समन्स बजावण्याची पूर्तता झाली असल्यास त्याचा अहवाल न्यायालयात येतो. त्यानंतरही राहुल गांधी न्यायालयात हजर झाले नाहीत, तर अटकेचे वॉरंट काढले जाते. परंतु, समन्स बजावण्याची पूर्तता झाली नसेल, तर प्रतीक्षा करावी लागते.