Rain : राज्यात मॉन्सूनची प्रगती संथच! पुढील दोन ते तीन दिवसात महाराष्ट्राच्या काही भागात सक्रिय होण्याचा अंदाज

Rain - नैर्ऋत्य मोसमी वाऱ्यांची (मॉन्सून) वाटचाल सुरू झाली असून राज्यात मात्र मॉन्सूनची प्रगती संथ गतीनेच सुरू हे. जूनचा तीसरा आठवडा उलटून गेला असून अद्याप राज्यात मॉन्सूनच्या पावसाची अद्याप प्रतिक्षा कायम आहे.

दरम्यान पुढील दोन ते तीन दिवसात मॉन्सून महाराष्ट्राच्या काही भागांसह ओडिशा, पश्‍चिम बंगाल, झारखंड आणि बिहारच्या काही भागात मॉन्सून प्रगती करण्याची शक्यता हवामानशास्त्र विभागाने वर्तवली आहे.

मॉन्सूने सध्या बिहार, झारखंड, पश्‍चिम बंगालच्या काही भागात दाखल झाला असून गुरुवारी (ता. २२) आंध्र प्रदेशाच्या उर्वरित भागासह तेलंगणा आणि ओडिशाच्या काही भागात प्रगती केली आहे. मॉन्सूनने राज्याच्या दक्षिण भागात तसेच तळ कोकणात (ता. ११) प्रवेश केला होता. मात्र त्यानंतर मॉन्सूनची वाटचाल ही थांबत-थांबत सुरू होती.

मात्र आता मॉन्सूनच्या वाटचालीस आता पुन्हा पोषक स्थिती निर्माण झाली असून यामुळे मॉन्सून राज्याच्या आणखी काही भागात प्रवेश करेल असी शक्यता वर्तविण्यात आली आहे. मॉन्सूनच्या वाटचालीची सीमा दक्षिण भारतात रत्नागिरी, रायचूर, खाम्मम, मलकंगिरी, परलखेमुंडीपर्यंत, तर पूर्व भारतात हलदिया, बोकारो, पाटणा, राक्सौलपर्यंत आहे.

दरम्यान पोषक स्थिती असल्यामुळे येत्या रविवारपर्यंत (ता. २५) मॉन्सून दक्षिण द्वीपकल्पाचा आणखी काही भाग, पश्‍चिम बंगाल, झारखंड, बिहार, ओडिशाच्या उर्वरित भागासह छत्तीसगड, उत्तर प्रदेश, उत्तराखंड, मध्य प्रदेशचा काही भाग व्‍यापनाची शक्यता आहे. दरम्यान पुणे आणि मुंबईसाठी मान्सून नुकताच दार ठोठावत आहे. अपेक्षित आर्द्रता, पश्‍चिम वारे अशा पोषक स्थितीमुळे ही मॉन्सूनच्या राज्यातील प्रवेशाबाबत हवामानशास्त्र विभागाने हा अंदाज दिला आहे.