Pune News : ‘‘वैद्यकीय शिक्षण मंत्री हसन मुश्रीफ यांच्या सांगण्यावरूनच ससून रुग्णालयाच्या वैद्यकीय अधीक्षकपदी डॉ. अजय तावरे यांची नियुक्ती केली,’’ असे सांगत बी. जे. वैद्यकीय महाविद्यालयाचे अधिष्ठाता डॉ. विनायक काळे यांनी तावरे यांच्या नियुक्तीचे बिंग फोडले.
नियुक्तीसाठी आमदार सुनील टिंगरे यांनी शिफारसपत्र दिले होते. त्या आधारे मुश्रीफ यांनी तावरे यांच्या नियुक्तीचे आदेश दिले, अशी कबुलीही डॉ. काळे यांनी बुधवारी पत्रकार परिषदेत दिली. पोर्श मोटार अपघात प्रकरणातील अल्पवयीन मुलाच्या रक्त नमुन्याची अदलाबदल केल्याच्या आरोपावर तावरे यांच्यासह आपत्कालीन विभागातील मुख्य वैद्यकीय अधिकारी डॉ. श्रीहरी हाळनोर आणि सफाई कर्मचारी अतुल घटकांबळे यांना पोलिसांनी अटक केली आहे. या पार्श्वभूमीवर काळे यांनी आयोजित पत्रकार परिषदेत माहिती दिली.
काळे यांच्या अधिष्ठातापदाच्या अधिकारात तावरे यांची वैद्यकीय अधीक्षक म्हणून नियुक्ती केली होती. या बद्दल विचारलेल्या प्रश्नाला उत्तर देताना काळे यांनी थेट मुश्रीफ यांच्यावर निशाणा साधला. ते म्हणाले, ‘‘आमदार टिंगरे यांनी तावरे यांना वैद्यकीय अधीक्षक करण्यासाठी शिफारसपत्र दिले. त्यावर मुश्रीफ यांनी आदेश दिला. त्या आधारावर तावरे यांची नियुक्ती केली. तत्कालीन अधीक्षक हे प्राध्यापक नसल्याने त्यांच्या जागी प्राध्यापक असलेल्या तावरे यांना पद देण्यात आले.’’
काळे म्हणाले, ‘‘ससूनसारख्या मोठ्या संस्थेमध्ये वेगवेगळे ३० विभाग आहेत. प्रत्येक विभागाचे प्रमुख, तेथील प्राध्यापक, डॉक्टरांपासून ते कर्मचाऱ्यांपर्यंत विविध जण कार्य करत असतात. या प्रत्येकाकडे लक्ष देणे अशक्य आहे. हे सगळे जण रुग्णालयातगैरप्रकार घडू नये, यासाठी प्रयत्न करत असतात. त्यानंतरही प्रत्येक गोष्टीची माहिती अधिष्ठात्याला असतेच असे नाही.’’
या बाबत मुश्रीफ यांच्याशी संपर्क साधला असता ते म्हणाले, ‘‘तावरे याला पदभार देण्याची शिफारस केली होती. तो योग्य नव्हता; तर तसा अहवाल देणे हे अधिष्ठात्यांचे कर्तव्य होते. पण त्यानंतर घडलेल्या उंदीर चावल्याच्या प्रकरणात तावरे याची लगेच बदली केली होती.’’
‘‘ससून रुग्णालयात नजीकच्या काळात आमूलाग्र बदल करण्यात येणार आहेत. भविष्यात अशा प्रकारच्या घटना करण्याची हिंमत होणार नाही, अशी अद्दल या प्रकरणातील आरोपींना घडविण्यात येईल.’’
- हसन मुश्रीफ, वैद्यकीय शिक्षण आणि संशोधन मंत्री
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.