विश्व हिंदू परिषदेच्या शोभायात्रेत रायफल व तलवारींचा नाच

पिंपरी (पुणे) : विश्व हिंदू परिषदेच्या कार्यकर्त्यांनी निगडीत रविवारी (ता. 2) रात्री काढलेल्या शोभा यात्रेत एअर रायफल व तलवारी मिरविण्यात आल्या. याप्रकरणी परिषदेचे पदाधिकारी व 250 कार्यकर्त्यांवर भारतीय हत्यार कायद्यान्वये निगडी पोलिस ठाण्यात गुन्हा दाखल करण्यात आला. 

विश्व हिंदू परिषदेचे अध्यक्ष शरद इनामदार, जिल्हा कार्याध्यक्ष धनाजी शिंदे व जिल्हा मंत्री नितीन वाटकर यांच्यासह 200 ते 250 कार्यकर्त्यांचा त्यामध्ये समावेश आहे. पोलिसांनी दिलेल्या माहितीनुसार, रविवारी सायंकाळी पाच ते रात्री दहापर्यंत निगडीतील अंकुश चौक ते यमुनानगर येथील ठाकरे मैदानादरम्यान परिषदेच्या वतीने विनापरवाना शोभायात्रा काढण्यात आली होती. शोभायात्रेतील चार मुलींच्या हातातील एअर राईफलचे ट्रीगर दाबताच आवाज येत होता. तसेच पाच मुली हातात तलवार घेऊन मिरवत असताना घोषणा देत होत्या.
 

पिंपरी चिंचवडमध्ये पोलिस आयुक्तांच्या आदेशानुसार कायदा सुव्यवस्था राखण्याच्या दृष्टिकोनातून शस्त्र बाळगण्यास बंद आहे. मात्र, परिषदेच्या कार्यक्रमात या आदेशाचा भंग करण्यात आला.