धक्कादायक ! नवरात्र उत्सवानिमित्त पुण्यात लैंगिक प्रशिक्षण देण्याचा प्रकार उघड

पुणे - पुणे शहरात नवरात्र उत्सावाच्या निमित्ताने तरुणांना लैंगिक प्रशिक्षण देण्याचा धक्कादायक प्रकार समोर आला आहे. सत्यम शिवम् सुंदरम् या फाउंडेशनच्या वतीने सेक्स तंत्र नावाने या प्रशिक्षणाचे ऑनलाईन बुकींग करण्यात येत आहे.

लैंगिक प्रशिक्षण देण्यासंदर्भात जाहिरात आणि मेसेज सध्या सोशल मीडियावर चांगलेच व्हायरल झाले आहे. या लैंगिक शिबिराचे आयोजन १, २ आणि ३ ऑक्टोबर २०२२ दरम्यान करण्यात आले आहे. यात तरुण आणि तरुणी सहभाग घेणार असल्याचं सांगण्यात आलं आहे.

या प्रशिक्षण शिबिरासाठी प्रत्येकी १५ हजार रुपये फी आकारली जाणार आहे. या बाबत राष्ट्रवादीच्या नेत्या रुपाली पाटील-ठोंबरे म्हणाल्या की, लैंगिक प्रशिक्षणाच्या नावाखाली हे सेक्स रॅकेट आहे. यासंदर्भात ऑनलाईन जाहिरात कऱण्यात आली आहे. यावर पोलिसांनी कारवाई करण्याची मागणी केली आहे. याचा नवरात्रीशी काहीही संबंध नसल्याचं रुपाली पाटील यांनी म्हटलं.

सेक्स रॅकेट चालण्यासाठी ही नवीन युक्ती शोधून काढली आहे. मात्र अशा प्रकारचं शिबीर आम्ही पुण्यात होऊ देणार नाही. जर लैंगिक शिक्षणाचे धडे द्यायचे असेल तर त्यासाठी प्रशिक्षित डॉक्टर असतात. शिवाय त्यावर वयाची अट टाकण्यात आली नसल्याचंही रुपाली पाटील यांनी म्हटलं आहे.