Sharad Pawar: विधानसभा निवडणुक जिंकण्याचा पवारांचा 'प्लॅन' ठरला, कार्यकर्त्यांना दिले हे निर्देश!

manchar: “भारतीय जनता पक्षाच्या सरकारने सत्तेचा वापर ठराविक लोकांच्या फायद्यासाठी व काही जणांना जाणीवपूर्वक त्रास देण्यासाठी केला. शेतात घाम गाळणार्या शेतकऱ्यांच्या विरोधात काम केले.

त्यामुळे लोकसभा निवडणुकीत राज्यातील जनतेने व शेतकऱ्यांनी त्यांना त्यांची जागा दाखावून दिली आहे. विधानसभा निवडणुकीत महाविकास आघाडी सत्ता हातात घेईल.” असा विश्वास जेष्ठ नेते शरद पवार यांनी व्यक्त केला.

तांबडेमळा-मंचर (ता.आंबेगाव) येथे शनिवारी (ता.२०) राष्ट्रवादी कॉंग्रेस शरदचंद्र पक्षाच्यावतीने आयोजित केलेल्या जनता दरबारात पवार बोलत होते.

यावेळी पुणे जिल्हा राष्ट्रवादी कॉंग्रेस शरदचंद्र पक्षाचे अध्यक्ष जगन्नाथ शेवाळे, खासदार डॉ.अमोल कोल्हे, भीमाशंकर कारखान्याचे माजी अध्यक्ष देवदत्त निकम, शेखर पाचुंदकर बाळासाहेब बाणखेले, सदाशिव थिटे उपस्थित होते. आगामी विधानसभा निवडणुकीच्या पार्श्वभूमीवर पवार यांनी जनता दरबाराच्या माध्यमातून आंबेगाव-शिरूर मतदारसंघातील १६ पंचायत समिती गणातील प्रमुख कार्यकर्त्यांशी संवाद साधून निवडणूक प्रचाराची पेरणी सुरु केली.

पवार म्हणाले “शेतकरी व तरुणांचे रोजगाराचे प्रश्न प्रश्न सोडवू. कार्यकर्त्यांनी घरोघरी जाऊन मतदारांना जागृत करण्याचे काम करावे.लोकसभा निवडणुकीप्रमाणेच सर्वांची साथ भक्कम राहू द्या.जुन्नर, खेड, आंबेगाव, शिरूर तालुक्यासह राज्यातील प्रत्येक जागा जिंकायच्या आहेत. देशात महाराष्ट्र राज्य प्रथम क्रमांकाचे आपल्या सर्वांना करायचा आहे. त्या दृष्टीने कामाला लागा.”