Dr. Amol Kolhe : आढळराव पाटील शब्द पाळणार का?

शिरूर - शिरूर लोकसभा मतदारसंघात महाविकास आघाडीचे उमेदवार डॉ. अमोल कोल्हे यांनी आपले प्रतिस्पर्धी महायुतीचे उमेदवार शिवाजीराव आढळराव पाटील यांचे आव्हान स्वीकारल्यानंतर सोमवारी (ता. ६) दुसरा व्हिडिओ सोशल मीडियावर पोस्ट केला. आढळराव पाटील आपल्या खासदारकीचा वापर कशा पद्धतीने स्वतःच्या कंपनीच्या फायद्यासाठी करत होते, हे या व्हिडिओत पुराव्यासह स्पष्ट केलं आहे.

जुन्नर तालुक्यातील ओतूरमध्ये जाहीर सभेत डॉ. कोल्हे यांनी आढळराव पाटील यांनी आपल्या खासदारकीच्या काळात स्वतःच्या कंपनीचा फायदा लक्षात घेत केवळ संरक्षण खात्याविषयी कसे प्रश्न विचारले, असे सांगत ‘आढळराव पाटील हे लोकप्रतिनिधीच्या वेशातील व्यापारी आहेत,’ असा आरोप केला होता. त्यावर आढळराव पाटील यांनी डॉ. कोल्हे यांना, ‘पुरावे सादर करा,’ असे आव्हान दिले होते.

आढळराव यांनी केवळ लोकसभेत संरक्षण खात्याविषयी विचारलेले प्रश्नच कोल्हे यांनी जनतेसमोर मांडले. सोमवारी याच संदर्भातला दुसरा व्हिडिओ डॉ. कोल्हे यांनी सोशल मीडियावर पोस्ट केला. यामध्ये डॉ. कोल्हे सांगतात, ‘डायनालॉग ही आढळराव पाटलांची जी कंपनी आहे, त्या कंपनीच्या वेबसाइटवर ही सर्व माहिती उपलब्ध आहे.

संरक्षण खात्याला विविध साहित्य पुरवणाऱ्या कंपनीचे मालक आणि तत्कालीन खासदार आढळराव पाटील यांनी २९ एप्रिल २०१६ ला विचारलेला प्रश्न या व्हिडीओत जनतेसमोर मांडला आहे. भारत सरकारने संरक्षण खात्याला लागणाऱ्या साहित्याच्या खरेदीचे धोरण तयार केलं आहे का?

यामध्ये भारतीय कंपन्यांसाठी धोरण आहे का? आणि केलं असेल तर त्याची सविस्तर माहिती द्यावी, असा प्रश्न आढळराव पाटील यांनी विचारला आहे. या प्रश्नांचा आणि शिरूर लोकसभेचा काय संबंध? याचं उत्तर आढळराव पाटील यांनी द्यावं, असे आव्हान पुन्हा एकदा डॉ. कोल्हे यांनी दिले आहे.

‘नेत्यांनी उत्तरं द्यावीत’

निवडणूक प्रचारात माझ्याबद्दल ‘नेता की अभिनेता?’ हा प्रश्न अनेक जण विचारतात, असे सांगत डॉ. कोल्हे म्हणाले, ‘‘आता आढळराव पाटील यांच्यासाठी मत मागणाऱ्या नेत्यांनी उत्तर द्यावीत की, नेत्याच्या रूपात स्वतःच्या कंपनीचे उखळ पांढरे करणारा लोकप्रतिनिधी हवा, की सर्वसामान्य जनतेचे प्रश्न मांडणार लोकप्रतिनिधी हवा?