शिरुर : तळेगाव ढमढेरे आरोग्य केंद्रातील कोरोनाबाधितांची साखळी तुटतातुटेना

तळेगाव ढमढेरे : येथील प्राथमिक आरोग्य केंद्राअंतर्गत १६ गावात दिवसेंदिवस कोरोनाबाधितांची संख्या वाढत असून चालू आठवड्यात सुमारे ४५० लोकांना कोरोनाची लागण झाली आहे. आज (ता. ८) एका दिवसात केंद्रात ९१ लोकांना कोरोनाची बाधा झाली. त्यात केंद्रातील तळेगाव ढमढेरे, सणसवाडी व शिक्रापूर गावातील कोरोना बाधितांची संख्या मोठी आहे, अशी माहिती वैद्यकीय अधिकारी डॉ. प्रज्ञा घोरपडे यांनी दिली.

तळेगाव ढमढेरे गावात कोरोनाचा प्रादुर्भाव कमी करण्यासाठी ग्रामपंचायत, महसूल व आरोग्य विभागामार्फत विविध उपाय योजना करण्यात येत आहेत. तरी कोरोनाचा प्रादुर्भाव कमी होत नसल्याने ग्रामस्थ व प्रशासन चिंताग्रस्त झाले आहेत.

कोरोनाच्या या दुसऱ्या लाटेत बाधितांचे प्रमाण जास्त असले तरी उपचारानंतर रुग्ण बरं होण्याचं प्रमाणही जास्त आहे. मात्र, कोरोनामुळे मृत्यूचं प्रमाणही जास्त असल्याने नागरिकांमध्ये भीतीचं वातावरण निर्माण झाले आहे. दुसऱ्या लाटेत कोरोनाबाधितांना विविध ठिकाणच्या मोठ्या हॉस्पिटलमध्ये उपचार घ्यावे लागत आहेत. दवाखान्यातील उपचारासाठीचा अफाट खर्च अनेक कुटुंबाना पेलवत नसल्याने अनेकजण हतबल झाले आहेत.

"तळेगाव ढमढेरे प्राथमिक आरोग्य केंद्रातील कोरोना बाधितांसाठी कोविड केअर सेंटर सुरु करण्यात आले असून, गरजूंनी या केंद्रात उपचार घेऊन कोरोनावर मात करावी" असे आवाहन आमदार अशोक पवार यांनी केले आहे. दरम्यान, कोरोनाला प्रतिबंध करण्यासाठी नागरिकांनी तोंडाला मास्क लावणे, गर्दीत जाणे टाळावे, सोशल डिस्टन्स पाळावा व लॉकडाऊनचे नियम काटेकोरपणे पाळावेत," असे आवाहन आमदार पवार यांनी नागरिकांना केले आहे.