पुणे - शिवाजीनगर ते लोणी काळभोरदरम्यानचा विस्तारित मेट्रो प्रकल्प खासगी भागीदारी तत्त्वावर (पीपीपी) की ठेकेदाराची नेमणूक करून (ईपीसी) याचा निर्णय घेण्यासाठी ‘आर्थिक तांत्रिक सल्लागार’ नेमण्याची प्रक्रिया पुणे महानगर क्षेत्र विकास प्राधिकरणाने (पीएमआरडीए) सुरू केली आहे. सल्लागाराकडून अहवाल प्राप्त झाल्यानंतर या संदर्भातील निर्णय घेण्यात येणार आहे.
विभागीय आयुक्त सौरभ राव यांच्या अध्यक्षतेखाली यावर निर्णय घेण्यासाठी ‘पुमटा’ची (पुणे युनिफाइड अर्बन ट्रान्स्पोर्ट ॲथॉरिटी) बैठक झाली. बैठकीला पुलगेट ते हडपसरदरम्यान आठ किलोमीटर मार्गाचा तांत्रिक व आर्थिक अहवाल ‘पीएमआरडीए’ आणि महामेट्रोने स्वतंत्रपणे तयार करावा. त्यामध्ये आर्थिकदृष्ट्या कोणाचा प्रकल्प व्यवहार्य आहे. त्यावर कोणी त्या मार्गाचे काम करावे, यावर निर्णय घेण्यात यावा, असे ठरले होते.
त्यानुसार शिवाजीनगर ते लोणी काळभोरदरम्यान मेट्रोच्या विस्तारीकरण कोणत्या पद्धतीने करणे योग्य होईल, याबाबत निर्णय घेण्यासाठी ‘पीएमआरडीए’ने ‘आर्थिक तांत्रिक सल्लागार’ नेमावा, अशी सूचना ‘पुमटा’ने केली. या मार्गाचा सविस्तर प्रकल्प अहवाल (‘डीपीआर’) यापूर्वीच ‘पीएमआरडीए’ने केला आहे.
आता या मार्गाचा ‘आर्थिक तांत्रिक सल्लागार’ नेमण्याची निविदा प्रक्रिया ‘पीएमआरडीए’कडून सुरू केली आहे.
अशी आहे स्थिती
हिंजवडी ते शिवाजीनगर या मेट्रो प्रकल्पाचे काम ‘पीएमआरडीए’कडून हाती
पिंपरी-चिंचवड ते स्वारगेटदरम्यानचे काम महामेट्रोकडे
खडकवासला ते खराडी २८ किलोमीटर मार्ग महामेट्रोकडून प्रस्तावित
‘पीएमआरडीए’चा विस्तारित मेट्रो मार्ग हा शिवाजीनगर पुलगेट, हडपसर आणि लोणी काळभोर, तर एक फाटा सासवड रोडवर
महामेट्रोचा खडकवासला हा मार्ग स्वारगेट, पुलगेट-हडपसर फाटा ते खराडी
या दोन्ही मार्गावर पुलगेट ते हडसपर हा सुमारे आठ किलोमीटर लांबीचा मार्ग एकत्रित (कॉमन) असल्यामुळे तो कोणी विकसित करावा, असा प्रश्‍न निर्माण
कोणाचे काय म्हणणे?
माण या ठिकाणी मेट्रोसाठी कार डेपो आहे. तसेच लोणी काळभोर या ठिकाणीदेखील कार डेपोसाठी आरक्षण आहे. त्यामुळे पुलगेट ते हडपसर या मेट्रो मार्गाचे काम करण्यास परवानगी द्यावी, अशी मागणी ‘पीएमआरडीए’ची आहे. तर खडकवासला येथे मेट्रोसाठी कारडेपो करण्यात येणार आहे, त्यामुळे पुलगेट ते हडपसर या दरम्यानच्या मेट्रो मार्गाचे काम आम्ही करतो, असे महामेट्रोचे म्हणणे आहे.
प्रस्तावित मार्ग
खडकवासला- स्वारगेट-पुलगेट- हडपसर फाटा (मगरपट्टा सिटी) ते खराडी हा सुमारे २८ किलोमीटर लांबीचा मेट्रो मार्ग महामेट्रेाकडून प्रस्तावित
शिवाजीनगर-पुलगेट-हडपसर ते लोणी काळभोर हा १९ किलोमीटर मेट्रो मार्ग ‘पीएमआरडीए’कडून प्रस्तावित
शिवाजीनगर ते लोणी काळभोर हा मेट्रो मार्ग ‘पीपीपी’ अथवा ‘ईपीसी’ तत्त्वावर राबविणे योग्य होईल, याचा निर्णय घेण्यासाठी ‘आर्थिक तांत्रिक सल्लागार’ नेमण्याच्या सूचना ‘पुमटा’ने प्राधिकरणाला दिल्या आहेत. त्यानुसार सल्लागार नियुक्त करण्याची प्रक्रिया ‘पीएमआरडीए’ने सुरू केली आहे.
- रिनाज पठाण, मुख्य अभियंता, मेट्रो प्रकल्प ‘पीएमआरडीए’
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.