नोकरी गेल्यामुळं तरुणावर आली चोरीची वेळ; पुण्यातला धक्कादायक प्रकार

पुणे - देशात बेरोजगारीचं संकट किती मोठं आहे, याचा प्रत्यय पुण्यातील एका चोरीच्या प्रकरणात आला आहे. एकेकाळी नोकरी होती तेव्हा सगळं सुरळीत होतं. पण, नोकरी गेली आणि तरुणाला घरखर्च भागवणं अशक्य झालं. अखेर त्यानं चोरीचा मार्ग स्वीकारल्याचं स्पष्ट झालंय. पोलिस चौकशीत हा प्रकार समोर आलाय. 

ताज्या घडामोडींसाठी डाऊनलोड करा ई-सकाळचे ऍप

नोकरी गेल्यानंतर बेरोजगार झालेल्या तरुणाने उपजीविका भागविण्यासाठी चक्‍क मोबाईल चोरी करण्यास सुरवात केल्याचा प्रकार पोलिस तपासात समोर आला आहे. गुन्हे शाखेच्या युनिट दोनच्या पथकाने आरोपीला ताब्यात घेतले आहे. 

आरोपीच्या ताब्यातून दोन मोबाईल जप्त करण्यात आले असून, त्याने पत्नीकडे आणखी मोबाईल ठेवल्याची कबुली पोलिसांकडे दिली आहे. 

धक्कादायक : रागाच्या भरात त्याने केला मित्राचा खून अन् जाळला मृतदेह!

हुसेन शेख (रा. नागपूर चाळ, येरवडा) असे संशयित आरोपीचे नाव आहे. 
पोलिसांनी दिलेल्या माहितीनुसार, कोरेगाव पार्क येथील मोबाईल चोरीच्या घटनांचा छडा लावण्यासाठी गुन्हे शाखेच्या युनिट दोनच्या पथकाने समांतर तपास सुरू केला होता. पोलिसांनी सीसीटीव्ही फुटेज तपासल्यानंतर तो हुसेन शेख असल्याची माहिती मिळाली. आरोपीचे घर गाठल्यानंतर तो औरंगाबाद येथे पत्नीकडे, तर कधी नगर येथील मित्राकडे राहत असल्याचे समजले. दरम्यान, आरोपी कोरेगाव पार्क येथे आल्याची माहिती पोलिस नाईक स्वप्नील कांबळे यांना मिळाली. त्यावरून युनिट दोनचे पोलिस निरीक्षक महेंद्र जगताप यांच्या पथकाने आरोपीला दोन मोबाईलसह ताब्यात घेतले.