Leopard Attack : शिरोली खुर्द येथे बिबट्याच्या हल्ल्यात लहान मुलीचा मृत्यू

ओझर : शिरोली खुर्द ता. जुन्नर येथील पाटील मळा वस्तीवरील संपत केरू मोरे या शेतकऱ्याच्या शेतात वास्तव्यास असलेल्या मेंढपाळांची लहान मुलगी बिबट्याने पळवून नेली असल्याची माहिती पोलिस पाटील विक्रम मोरे यांनी दिली.

हि घटना गुरूवार ता. ११ रोजी पहाटे पाच वाजण्याच्या सुमारास घडली. या घटनेबाबत मिळालेल्या माहितीनुसार आई वडीलांच्यामध्ये झोपलेली संस्कृती संजय कोळेकर हि अंदाजे दिड ते दोन वर्षांची मुलगी बिबटयाने उचलून नेल्याची माहिती वन विभागाला प्राप्त झाल्या बरोबर वनपरिक्षेत्र अधिकारी प्रदिप चव्हाण यांच्या मार्गदर्शनाखाली वन विभागाचे पथक घटनास्थळी दाखल झाले.

तसेच गावातील व परिसरातील नागरिकही मोठया संख्येने जमले. त्यांनी आजूबाजूच्या शेतात मुलीचा शोध घेतला. ड्रोन कॅमेऱ्याच्या माध्यमातून शोध घेतला असता ऊसाच्या शेतातून इकडून तिकडे पळाला असल्याचे निदर्शनास आले. तसेच एका शेताच्या जवळ मुलीच्या डोक्यातील टोपडे, फ्रॉक आढळून आला.

तेथील परिसरातील शेतात शोध घेतला असता सुभाष थोरात व विश्वास जाधव यांच्या ऊसाच्या शेताच्या बांधावर मुलीच्या डोक्याची कवटीची हाडे व उजव्या पंजाचा काही भाग आढळून आला. उपविभागीय पोलिस अधिकारी रवींद्र चौधर,सहाय्यक पोलिस निरीक्षक दिलीप पवार यांनी पंडीत थोरात,सागर शिंदे यांच्या पोलिस पथकासह घटनास्थळी जाऊन पंचनामा करून प्राप्त अवशेष शवविच्छेदनासाठी पाठवले आहेत.

या घटनेची माहिती मिळताच जुन्नरचे आमदार अतुल बेनके विघ्नहर सहकारी साखर कारखान्याचे अध्यक्ष घटनास्थळी पोहचले. या परिसरात बिबटयाचा उपद्रव हा नागरिकांसाठी डोकेदुखीचा विषय असून वन विभागाने याबाबत ठोस उपाय योजना करण्याची गरज आहे.