मृतांच्या नातेवाइकांना पाच लाखांची मदत जाहीर : उपमुख्यमंत्री

पुणे : मुळशी तालुक्यातील उरवडे गावाजवळ रासायनिक कंपनीला लागलेल्या आगीच्या दुर्घटनेच्या चौकशीचे आदेश देण्यात आले आहेत. या दुर्घटनेतील मृतांच्या कुटुंबीयांना राज्य सरकारकडून प्रत्येकी पाच लाख रुपयांची मदत देण्यात येईल, अशी माहिती उपमुख्यमंत्री अजित पवार यांनी दिली. (state government will provide Rs 5 lakh aid to families of victims said Deputy CM Ajit Pawar)

पवार म्हणाले, ''ही आग आटोक्यात आली असून, कुलिंग ऑपरेशन पूर्ण झाल्यानंतर आगीचे प्राथमिक कारण समजेल. पुणे जिल्हाधिकाऱ्यांनी मावळ प्रांताधिकाऱ्यांच्या अध्यक्षतेखाली तज्ज्ञांच्या समितीकडून आगीच्या कारणांची चौकशी करण्याचे आदेश दिले आहेत. त्या चौकशीतून आगीची नेमकी कारणे समोर आल्यानंतर दुर्घटनेची जबाबदारी निश्चित करता येईल.''

या आगीची माहिती मिळाल्यानंतर अग्निशमन दल आणि स्थानिक प्रशासन तात्काळ घटनास्थळी पोचले. तसेच, जिल्हाधिकारी, जिल्हा पोलिसप्रमुख आणि पीएमआरडीए आयुक्तांकडून याबाबत माहिती घेतल्यानंतर त्यांनाही तात्काळ दुर्घटनास्थळी पोचून आवश्यक उपाययोजना करण्याचे निर्देश दिले. जिल्हाधिकाऱ्यांनी परिस्थितीची पाहणी करुन चौकशीचे आदेश दिले आहेत. पोलिसांनी प्राथमिक गुन्हा नोंदविण्यात आल्याची माहिती पवार यांनी दिली.

आगीत कामगारांचा मृत्यू झाल्याची घटना दुर्दैवी, क्लेशदायक आहे. अग्निशमन दलाने आग आटोक्यात आणून कामगारांच्या बचावासाठी शर्थीचे प्रयत्न केले. परंतु काहींना वाचवता आले नाही. अशा दुर्घटना भविष्यात घडू नयेत, यासाठी आवश्यक खबरदारी घेण्याचे निर्देश जिल्हा प्रशासनाला देण्यात येतील.

- अजित पवार, उपमुख्यमंत्री

पुण्यातील आणखी बातम्या वाचण्यासाठी येथे क्लिक करा.