इंद्रायणी घाटावर गुंडांची दहशत; रात्रीच्या काळोखात लुटतायेत नागरिकांना

आळंदी (पुणे) : परिसरातील इंद्रायणी घाटावर रात्री गुंडांकडून मारहाण करून नागरिकांना लुटण्याचे प्रकार घडत आहेत. यामुळे परिसरामध्ये दहशतीचे वातावरण आहे. इंद्रायणी घाटावरील विद्युत दिवे बंद असल्याने या ठिकाणी रात्री अंधार असतो. बेरोजगार आणि लॉकडाउनमध्ये अडकलेले दोनशे अडीचशे लोक रात्रीच्या वेळी घाटावर झोपण्यासाठी येतात. परंतु, अंधाराचा गैरफायदा घेऊन काही जण त्यांच्याकडील मोबाईल व पैसे लुटत आहेत.

पुण्यावरून 'या' आठ शहरांसाठी सुरु झाली विमानसेवा; लोहगाववरून टेक ऑफ

या गुंडाकडून कोयत्याचाही धाक दाखवला जात असल्याचे नागरिकांनी सांगितले. यामुळे परिसरातील भीतीचे वातावरण असून नागरिकांनी रात्रीच्या जेवणानंतर घाटावर फिरण्यासाठी येणे बंद केले आहे. देहूफाटा आणि पद्मावती झोपडपट्टीतील कोयता गॅंगचे गंड परिसरात सक्रिय असल्याची चर्चा नागरिकांमध्ये आहे.

पुण्याच्या बातम्या वाचण्यासाठी येथे  क्लिक करा

देहूफाटा ते चाकण चौक, घाटावरील वैतागेश्वर मंदिर, इंद्रायणीनगर ते साधकाश्रम, भक्त पुंडलिक मंदिर या भागात चोऱ्या करण्यासाठी ही गुंड रात्रीच्या वेळी येत आहेत. यामुळे परिसरातील विद्युत दिवे रात्री सुरू ठेवावे. तसेच पोलिसांनी रात्री गस्त घालण्याची मागणी नागरिकांकडून होत आहे. 

पोलिस चौकी ओस 
काही महिन्यांपूर्वी पोलिसांनी मोठ्या थाटात इंद्रायणी घाटावर चौकी उभारून तिचे उद्घाटन केले. त्यानंतर या चौकीत जेमतेम महिनाभर पोलिस थांबले. मात्र, त्यानंतर ते चौकीकडे फिरकले नाही. परिणामी गुंड प्रवृत्तीच्या लोकांचे फावत असल्याचे नागरिकांचे म्हणणे आहे. पोलिसांनी या गुंडाचा बंदोबस्त करण्याची मागणी होत आहे.