रुपीच्या ठेवीदारांसाठी अर्थमंत्र्यांना साकडे

पुणे: रुपी सहकारी बॅंकेच्या समस्येचे निराकरण करून ठेवीदारांना दिलासा द्यावा, अशी मागणी खासदार गिरीश बापट आणि रुपी बॅंकेचे प्रशासक सुधीर पंडित यांनी केंद्रीय अर्थमंत्री निर्मला सीतारामन यांच्याकडे केली. खासदार बापट आणि ‘सहकार भारती’चे राष्ट्रीय प्रचारप्रमुख भालचंद्र कुलकर्णी यांच्यासमवेत रुपी बँकेचे प्रशासक पंडित यांनी ११ ऑगस्ट रोजी अर्थमंत्री सीतारामन यांची दिल्लीत भेट घेतली.

शतकोत्तर इतिहास असणारी रुपी बँक गेली आठ वर्षे रिझर्व्ह बँकेच्या सर्वंकष निर्बंधाखाली आहे. त्यामुळे बँकेच्या समस्येचे लवकर निराकरण करून ठेवीदारांना दिलासा मिळणे आवश्यक आहे. व्यवहार्य दृष्टिकोन ठेवून प्रागतिक व वैविध्यपूर्ण उपाययोजना केल्यास हा प्रलंबित प्रश्न सुटू शकेल. तसेच, नागरी सहकारी बँक क्षेत्रावरही त्याचा चांगला परिणाम होईल. त्यामुळे अर्थमंत्र्यांनी त्यांच्या अधिकारात बँकेच्या प्रश्‍नावर दीर्घकालीन उपाययोजना त्वरित होण्यासाठी लक्ष घालावे, अशी मागणी या वेळी करण्यात आली.

"रुपी बँकेच्या प्रश्‍नावर रिझर्व्ह बँकेने वेळीच दीर्घकालीन तोडगा काढला असता तर सर्व ठेवीदारांना त्यांच्या ठेवी परत मिळाल्या असत्या. गेली आठ वर्षे प्रश्न रखडल्यामुळे ठेवीदार तणावाखाली आहेत. अनेकांना आर्थिक विवंचनेतून जावे लागत आहे. उदार व व्यवहार्य दृष्टिकोन ठेवून रिझर्व्ह बँकेने योग्य उपाययोजना करून विमा संरक्षित नसलेल्या ठेवीदारांचेही हित जपावे". सीए सुधीर पंडित, प्रशासक- रुपी सहकारी बॅंक