चोरट्यांनी "एसआरए'च्या साडे चारशे सदनिकांमधील सव्वा लाखाचे नळ पळविले

पुणे : झोपडपट्टी पुनर्वसन प्राधिकरणाच्या (एसआरए) हडपसर येथील शिंदे वस्तीत बांधलेल्या "एसआरए'च्या इमारतीमधी नळ चोरट्यांनी चोरुन नेले. साडे चारशे सदनिकांमधील सव्वा लाख रुपयांचे नळ चोरट्यांनी चोरुन नेले आहेत. याप्रकरणी हडपसर पोलिस ठाण्यात गुन्हा दाखल करण्यात आला आहे. याप्रकरणी "एसआरए'चे तहसीलदार विकास भालेराव (47) यांनी हडपसर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, भालेराव हे "एसआरए'च्या पुणे व पिंपरी विभागातील ताबा विभागाचे प्रमुख आहे. (Pune News)

झोपडपट्टी पुनर्वसन योजनेअंतर्गत हडपसरमधील शिंदे वस्तीत काही इमारती उभारण्यात आल्या आहेत. त्यापैकी "ए' आणि "बी' या इमारतीत एकुण 439 सदनिका आहेत. या इमारतीमध्ये काही नागरीकांना सदनिकांचा ताबा देण्यात आला आहे, तर काही सदनिकांचा अद्याप ताबा दिलेला नसल्याने त्या सदनिका कुलूप लावून बंद ठेवण्यात आलेल्या आहेत. इमारतीच्या सुरक्षेसाठी सुरक्षारक्षकांचीही नेमणूक केलेली आहे. चोरट्यांनी बंद सदनिकांच्या दरवाज्याचे कुलुप तोडून स्वयंपाकघर, प्रसाधनगृहातील नळ, शॉवर चोरून नेल्याची घटना नुकतीच उघडकीस आली. चोरीस गेलेल्या मुद्देमालाची किंमत एक लाख नऊ हजार 750 रुपये असल्याचे भालेराव यांनी फिर्यादीत नमूद केले आहे. या प्रकरणाचा तपास पोलिस उपनिरीक्षक सौरभ माने करीत आहेत.