हॉटेल मालकावर वार करून खुनाचा प्रयत्न करणाऱ्या तिघांना अटक

पुणे - धायरी येथील हॉटेल मालकावर (Hotel Owner) धारदार शस्त्रांनी वार (Attack) करून खुनाचा प्रयत्न करणाऱ्या टोळीतील तिघांना गुन्हे शाखेच्या खंडणी विरोधी पथक वेल्हे येथे अटक (Arrested) केली. हि घटना 21 ऑगस्ट रोजी धायरी येथे घडली होती.

ओमकार संतोष सातपुते (वय 18), तेजस गणेश निवंगुणे (वय 20) आणि अनिकेत विनायक जाधव (वय 21, तिघेही रा. धायरी) अशी अटक केलेल्यांची नावे आहेत. पोलिसांनी दिलेल्या माहितीनुसार, धायरी येथील गणेशनगर परिसरात असणाऱ्या "हॉटेल गारवा' या बिर्याणी हॉटेलचे मालक व कर्मचाऱ्यांसमवेत ओंकार सातपुते, संकेत मिरगल यांची मागील शनिवारी दुपारी चार वाजता किरकोळ कारणवरून भांडणे झाली. याच भांडणाच्या रागातून अनिकेत जाधव, वैष्णव उर्फ बापु झांबरे, महेश संजय उबाळे, ओंकार सातपुते व संकेत मिरगल यांनी हॉटेलमध्ये घुसुन तोडफोड करीत त्यांच्यावर वार धारदार शस्त्राने वार केले होते. या घटनेत हॉटेलचे मालक गंभीर जखमी झाले होते.

दरम्यान बुधवारी खंडणी विरोधी पथकाचे (क्रमांक 1) पोलिस अधिकारी तडीपार करण्यात आलेल्या आरोपींचा शोध घेण्यासाठी गस्त घालत होते. त्यावेळी पोलिस कर्मचारी रमेश चौधर, गजानन सोनवलकर यांना संबंधीत गुन्ह्यातील तीनही आरोपी पुरंदर येथील येथील डोंगर परिसरात लपून बसल्याची माहिती मिळाली. त्यानुसार पोलिसांनी त्यांचा माग काढत तिघांनाही बेड्या ठोकल्या.