Pune : लाच घेतल्याप्रकरणी सहायक पोलिस निरीक्षकासह तिघांना पोलिस कोठडी

पुणे : दीड लाखांची लाच घेतल्याप्रकरणी अटक करण्यात आलेल्या निगडी पोलिस चौकीतील एका सहायक पोलिस निरीक्षकासह तिघांना विशेष न्यायालयाने २० जूनपर्यंत पोलिस कोठडीत ठेवण्याचे आदेश दिले आहेत.

सहायक पोलिस निरीक्षक अमोल प्रकाश कोरडे, पोलिस कर्मचारी सागर तुकाराम शेळके आणि मध्यस्थ सुदेश शिवाजी नवले (वय ४३, रा.वाल्हेकरवाडी, चिंचवड) अशी पोलिस कोठडी सुनावलेल्या आरोपींची नावे आहेत. खंडणीचा गुन्हा दाखल न करण्यासाठी शनिवारी एका तक्रारदाराकडून दीड लाख रुपयांची लाच घेतल्याप्रकरणी तिघांना अटक करण्यात आली होती.

लाचलुचपत प्रतिबंधक विभागाकडून आरोपींना रविवारी विशेष न्यायालयात हजर करण्यात आले. त्यावेळी विशेष न्यायालयाने तिघांना येत्या २० जूनपर्यंत पोलिस कोठडीत ठेवण्याचे आदेश दिले आहेत. पुढील तपास पोलिस उपअधीक्षक माधुरी भोसले करीत आहेत.